قول
جبار کاکا کو جب لگا کہ وہ اب بستر سے دوبارہ اٹھ نہیں سکے گا تو اس نے بیوی سے کہا ’’میرا آخری وقت آگیا ہے ذرا ماجد کو پیغام بھیجو کہ وہ آئے۔ میں اس سے کچھ کہنا چاہتا ہوں‘‘۔
جبار کاکا کی بیوی بہت ذہین، نڈراور بہادر عورت تھی۔ اس نے شوہر کی باتیں سنیں مگر جواب دینے کی بجائے خاموش رہی۔
اس نے اپنے اکلوتے بیٹے کو پیغام بھیجا کہ اس کا باپ بستر مرگ پر ہے اور اس سے کچھ کہنا چاہتا ہے۔
ماجد اسی گاؤں میں الگ مکان میں رہتا تھا۔ جب اسے باپ کا سندیسہ ملا تو وہ سارے کام چھوڑ کر باپ سے ملنے آیا۔
باپ نے کسی تمہید کے بغیر بیٹے سے کہا۔
’’ماجد بیٹا میرا آخری وقت آگیا ہے۔ اس سامنے والی الماری میں اسی ہزار روپے ہیں وہ نکال کر اپنے پاس رکھو اور میری موت کے بعد میری تجہیز و تکفین اور دیگر رسومات پرخرچ کرنا۔‘‘
بیٹے نے روپے نکالے اور چلا گیا۔
جبار کاکا کی بیوی نے ایک ڈاکٹر کو بلایا۔ ڈاکٹر نے علاج کیا جبار کاکا چند دنوں میں صحت یاب ہو گر روز مرہ کے کام کرنے لگا۔
دو ماہ بعد جبار کاکا کو روپیوں کی سخت ضرورت آن پڑی تو وہ سیدھا اپنے بیٹے ماجد کے پاس گیا اور اس سے کہا۔
’’بیٹا مجھے روپیوں کی سخت ضرورت پڑی ہے وہ رقم جو میں نے تم کو دی تھی مجھے لوٹا دے۔‘‘
بیٹے نے جواب دیا
’’میں کیسے رقم لوٹا دوں، قول تو یہ ہے کہ آپ کے مرنے کے بعد خرچ کروں۔۔۔۔۔۔‘‘
کرامت
شادی کے بعد میری بیوی چار سال تک ماں نہیں بن سکی۔ ہم نے کئی ڈاکٹروں سے مشورہ کیا مگر بے سود۔
کئی آستانوں اور زیارت گاہوں پر حاضری دی مگر کوئی نتیجہ نہ نکلا۔ آخر ایک دن ایک بندہ خدا نے کراماتی بابا کا پتہ دیا۔
میں بیوی کو وہاں لے گیا۔ بڑی مشکل سے کراماتی بابا راضی ہوا اور اس نے گیارہ دن گیارہ سو بار بندکمرے میں منتر پڑھے اور میری بیوی کو ایک سو ایک تعویذ گھول کر پینے کے لئے دے دیئے۔ دس ماہ کے بعد ہمارے آنگن میں ایک خوب صورت پھول کھلا۔
صمد میر یہ کہنے کے بعد رک گیا اور تمباکو کے کش لینے لگا۔ اس کے سامنے رجب ڈار اپنی بیوی کے ساتھ بیٹھا تھا۔
وہ دونوں بھی اولاد کی نعمت سے محروم تھے۔
رجب ڈار کی بیوی بہت ذہین اور چالاک تھی مگر اولاد کے لئے وہ کچھ بھی کر سکتی تھی۔
رجب ڈار نے اسی وقت کراماتی بابا کا ایڈریس لے لیا۔
صمد میر کا معصوم بچہ دوڑتے دوڑتے اپنے باپ کے پاس آکر باپ کی گود میں بیٹھ گیا۔
رجب ڈار کی بیوی کو اس پر بہت پیار آیا۔ اس نے اسے گود میں لیا اور خوب پیار کیا۔ بچے کی شکل اس کے دل و دماغ میں سما گئی۔ کیا نام ہے تمہارا۔
میرا نام کرامت ہے۔۔بچے نے جواب دیااور پھر صمد ڈار کی بیوی نے اسے زور سے سینے سے لگایا اور چہرے پر کئی بوسے ثبت کئے۔ بچے کا چہرہ اس کی آنکھوں میں گھر کر گیا۔ وہ دونوں وہاں سے چلے مگر وہ اپنا دل بچے کے پاس چھوڑ گئی ۔۔چند روز بعد۔۔۔۔۔۔
صمد ڈار کی بیوی کراماتی بابا کے کمرے میں باقی مریدوں کے ساتھ بیٹھی تھی۔بابا آئے اور مسند پر بیٹھے ۔صمد میر کی بیوی نے اس کا چہرہ دیکھا تو اُسے جیسے جھٹکا لگا۔ وہ حیرت کے سمندر میں ڈوب گئی۔
صمد میر کے بیٹے کا چہرہ بالکل کراماتی بابا کےچہرے سے ملتا جلتا تھا۔۔
رپورٹ
وہ اسٹیٹ اسپتال کی سینٹرل لیبارٹری کے کاریڈور میں کھڑا ٹیکنیشن کا انتظار کر رہا تھا۔ اسے وہاں سے رپورٹ لینا تھی۔
چار ماہ پہلے اس کے بوڑھے اور ضعیف باپ کی گردن میں چند گلٹیاں نمودار ہوگئی تھیں اور ڈاکٹر نے ان میں سے ایک گلٹی کی بایوپسی لی تھی اور اس کا پیتھولاجیکل ٹیسٹ کروانا چاہا تھا۔ اب وہ آج چوتھی بار رپورٹ لینے آیا تھا لیکن آج بھی ٹیکنیشن نے کہا۔
ابھی رپورٹ تیار نہیں ہے پیتھالوجسٹ کو پھر سے دیکھنا پڑے گا۔
علاج کرنے والا ڈاکٹر کہتا ہے کہ جب تک ٹیسٹ کی رپورٹ نہ آئے گی تب تک علاج نہیں ہوسکتا اور یہ لوگ رپورٹ دیتے نہیں، میں کیا کروں وہ اپنے آپ سے کہنے لگا۔
چند دنوں بعد اس کے باپ کی حالت بگڑ گئی اور وہ ایڑیاں رگڑتے رگڑتے چل بسا۔ اس نے باپ کی تجہیز و تکفین اچھی طرح سے کی مگر اسے شدید دکھ رہا کہ اس کا باپ بغیر علاج و معالجہ کے چل بسا۔
ایکماہ بعد وہ اپنے بیمار بیٹے کو اسٹیٹ اسپتال لے گیا وہاں ٹیکنیشن کی نظر اس پر پڑی تو اس نے اس کے باپ کا ٹیسٹ رپورٹ اسے دے دیا۔ وہ حیران رہ گیا لیکن رپورٹ لےلی۔ دوسرے دن وہ اپنے باپ کی قبر کے پاس بیٹھا زار و قطار رو رہا تھا وہاں سے ایک شخص گزرا اس نے اس سے پوچھا۔۔
کیا کر رہے ہو بھائی
اس نے آنسو بھری آنکھوں سے جواب دیا
بابا کی رپورٹ آئی ہے، اب اس رپورٹ کا کیا کروں وہی سوچ رہا ہوں۔۔
