افسانچے

رئیس کالج پارک کے بڑے چنار کے سائے تلے یادوں کے سمندر میں ہچکولے کھا رہا تھا ۔ اسے کالج کے دنوں کی حسین اور خوبصورت یادیں تسکین بخش رہی تھیں ۔ تبھی اسے ادیفہ کی مذاق میں کہی ہوئی وہ بات یاد آئی کہ " دس سال بعد ہم اسی موسم میں یہیں ملیں گے " 

وہ ہنس دیا " گردش ایام میں ایسی باتیں یاد نہیں رہتیں " 

دو پہر کی دھوپ میں چنار کے سائے میں نیند کا غلبہ ہوا اور وہ سو گیا ۔ کچھ ہی دیر ہوئی کہ کسی کی پکار نے اسے جگا دیا ۔ اُس نے آنکھیں موندھیں اور کچھ سنبھلا کہ سامنے ایک حسین اور خوبصورت عورت کو دیکھ کر چونک گیا ۔ اسکے حلق سے صرف ایک لفظ نکل سکا۔ 

" ادیفہ" 

 

وہ اب تک بہت ساری اموات کے صداقت نامے پر دستخط کر چکا تھا اور یہ اس کیلئے کوئی مشکل کا کام نہیں تھا کیونکہ یہ اسکا پیشہ تھا ۔ علاقے میں ڈاکٹر اعجاز قابل اور بہادر ڈاکٹروں میں شمار کئے جاتے تھے ۔ لیکن آج خون میں لت پت لاش کی تصدیق کرنے میں اسکے ہاتھ کانپ رہے تھے ۔ ڈیتھ سرٹیفکیٹ اسکے سامنے میز پر پڑی تھی اور اسکی آنکھوں سے اشک رواں تھے کہ نرس نے پوچھا ۔ " ڈاکٹر صاحب اس پر نام کیا لکھوں" 

تبھی سسکیوں بھرے لہجے میں اعجاز صاحب نے جواب دیا، 

" عمر اعجاز " 

 

 

 

 

 

ہندوارہ ،متعلم شعبہ اردو کشمیر یونیورسٹی،9596253135