یو این آئی
غزہ//غزہ میں اسرائیلی حملوں سے جمعہ کی صبح سے70فلسطینی جاں بحق ہوگئے۔بین الاقوامی خبروں کے مطابق غزہ کے مختلف علاقوں میں اسرائیلی فضائی حملوں سے مزید 64فلسطینی جاں بحق ہوگئے۔ جنوبی غزہ کے شہر خان یونس میں ایک دکان پر ہونے والے اسرائیلی حملے میں کم از کم 6 فلسطینی جان سے گئے۔ جنگ زدہ علاقے کے لوگ’’نفسیاتی طور پر ٹوٹ چکے ہیں‘‘کیونکہ اسرائیلی بمباری مسلسل جاری ہے اور امدادی سامان کی ناکہ بندی کی وجہ سے والدین کے پاس اپنے بچوں کے لیے کھانے کو کچھ نہیں ہے۔اقوام متحدہ کے ادارہ خوراک (WFP) نے فوری انتباہ جاری کیا ہے کہ “غزہ کو ابھی خوراک کی ضرورت ہے”، کیونکہ لاکھوں افراد بھوک کے خطرے سے دوچار ہیں۔غزہ کی وزارت صحت کے مطابق اسرائیل کی غزہ پر جنگ کے آغاز سے اب تک کم از کم 51,065 فلسطینی جاں بحق اور 116,505زخمی ہو چکے ہیں۔غزہ کے سرکاری میڈیا آفس نے جاں بحق ہونے والوں کی تعداد کو 61,700 سے زائد قرار دیا ہے اور کہا ہے کہ ملبے تلے دبے ہزاروں افراد کے جاں بحق ہونے کا خدشہ ہے۔ 7 اکتوبر 2023 کو حماس کی قیادت میں اسرائیل پر کیے گئے حملوں میں کم از کم 1,139 افراد ہلاک ہوئے اور 200 سے زائد کو یرغمال بنایا گیا تھا۔
