یو این آئی
غزہ //غزہ میں 7 اکتوبر 2023ء کو شروع ہونے والی اسرائیلی افواج کی بربریت کا سلسلہ تاحال جاری ہے، اسرائیلی فوج نے گزشتہ 24 گھنٹوں کے دوران 57 امدادی کارکنوں سمیت 120 فلسطینیوں کو ہلاک کردیا۔ بین الاقوامی میڈیا کے مطابق اسرائیلی فوج کی جانب سیغزہ شہر، خان یونس، رفح اور دیر البلح پر کی گئی بمباری کے نتیجے میں مزید 120 سے زائد فلسطینی ہلاک اور 474 افراد زخمی ہوئے ہیں۔غیر ملکی میڈیا کے مطابق صیہونی فوج کی بمباری کے نتیجے میں شہید ہونے والے افراد کی لاشیں ملبے تلے سے نکالنے کا عمل تاحال جاری ہے۔دوسری جانب فلسطینی مزاحمتی تنظیم حماس کی جانب سے اسرائیلی افواج کے خلاف جوابی کارروائیاں بھی جاری ہیں۔ حماس کے عسکری ونگ القسام بریگیڈز نے دعویٰ کیا ہے کہ غزہ کے جنوبی علاقے خان یونس میں ایک اسرائیلی فوجی کو ہلاک کر دیا گیا ہے۔فلسطینی وزارت صحت نے بتایا کہ غزہ میں 18 مارچ سے دوبارہ شروع ہونے والے اسرائیلی حملوں کے نتیجے میں شہید ہونے والوں کی تعداد 4,821 سے تجاوز کر گئی ہے۔غزہ کی وزارتِ صحت کے مطابق جنگ بندی کے خاتمے کے بعد سے اب تک 15,353 سے زائد فلسطینی زخمی ہو چکے ہیں۔7 اکتوبر 2023 کے بعد سے اسرائیلی حملوں میں اب تک ہلاک فلسطینیوں کی مجموعی تعداد 55 ہزار 104 سے تجاوز کر گئی ہے جن میں بچوں اور خواتین کی بڑی تعداد شامل ہیں۔حکومتی میڈیا دفتر کے مطابق 7 اکتوبر 2023 سے صیہونی فوج کی بمباری میں اب تک ہلاک فلسطینیوں کی مجموعی تعداد 69,000 سے تجاوز کر چکی ہے، ملبے تلے دبے ہزاروں افراد کو مردہ قرار دیا جا رہا ہے۔غزہ وزارت صحت کے مطابق غزہ میں اسرائیلی حملوں کے باعث زخمیوں کی تعداد 127,394 تک پہنچ گئی ہے۔
