عظمیٰ نیوز سروس
استنبول//استنبول میں آنے والا حالیہ 6.2 شدت کا زلزلہ 2045-2075 میں متوقع 7-7.2 شدت کے زلزلے کا پیش خیمہ تھا۔ ترکی کے ماہر زلزلیات احمد ایرکان نے جمعرات کو سپوتنک کو یہ اطلاع دی۔مسٹر ایرکان نے کہا “بدھ کو آنے والا زلزلہ مشرقی تھریس کے علاقے میں متوقع 7-7.2 شدت کا انتباہ تھا یا اس سے پہلے ایک قسم کا وارم اپ تھا۔ نئے زلزلے کا منبع اسی سطح پر ہوگا، زمین سے نیچے 7 سے 13 کلومیٹر [4.3-8 میل] لیکن میری تحقیق کے مطابق 2045 اور 2075 کے درمیان یہ زلزلے 22 گنا زیادہ طاقتور ہوں گے … ” ۔سیسمولوجسٹ نے کہا کہ استنبول کے وہ رہائشی جن کے مکانات 1999 کے بعد تعمیر کیے گئے تھے ، جب سخت تعمیراتی ضوابط متعارف کرائے گئے تھے اور جو ٹھوس زمین پر واقع ہیں، انہیں زیادہ فکر مند نہیں ہونا چاہیے ۔شمالی اناطولیہ فالٹ ترکی کے شمالی حصے میں پھیلا ہوا ہے اور اس کی ایک شاخ استنبول میں ساحلی پٹی کے قریب بحیرہ مرمرہ سے گزرتی ہے ، جس سے شہر کو طاقتور زلزلوں کا خطرہ لاحق ہے ۔ سٹی میئر کے دفتر نے اندازہ لگایا ہے کہ 7.5 شدت کا زلزلہ کم از کم 90,000 عمارتوں کو تباہ کر سکتا ہے ، جس سے 4.5 ملین افراد بے گھر ہو سکتے ہیں، جب کہ مجموعی نقصان 325 بلین ڈالر سے تجاوز کر سکتا ہے ۔بدھ کے روز ترکی کی ڈیزاسٹر مینجمنٹ ایجنسی نے کہا کہ استنبول میں 6.2 شدت کا زلزلہ آیا، جس کے بعد آفٹر شاکس آئے ۔ ترکی کے وزیر صحت کمال میمیسوگلو نے کہا کہ استنبول میں تقریباً 240 افراد زلزلے کے نتیجے میں زخمی ہوئے ہیں جن میں سے زیادہ تر بلندیوں سے گرنے سے خوف و ہراس میں مبتلا ہیں۔ ترکی میں حالیہ زلزلے کے دوران ایک شخص نے گھبرا کر جلد بازی میں بالکونی سے نیچے سڑک پر چھلانگ لگا دی، اس واقعے کی ویڈیو سوشل میڈیا پر وائرل ہو گئی ہے ۔
سوشل میڈیا پر گردش کرنے والی ویڈیو میں استنبول میں آنے والے زلزلے کے دوران ایک شخص کو بالکونی سے چھلانگ لگاتے ہوئے دیکھا جا سکتا ہے ۔ استنبول میں زلزلے کے دوران مختلف علاقوں میں خوف و ہراس کے لمحات دیکھنے میں آئے ۔ زلزلے کے فوراً بعد رہائشی گھروں سے چیخ و پکار کرتے ہوئے سڑکوں پر نکل آئے تھے ۔
