پریس انفارمیشن بیورو
نئی دہلی // وزیر دفاع راجناتھ سنگھ نے کہا ہے کہ اروناچل پردیش کے توانگ سیکٹر میںچینی فوج کی گھسنے کی کوشش ناکام بنادی گئی اور اس دورا ن کسی بھی بھارتی فوجی کی ہلاکت ہوئی نہ کوئی شدید زخمی ہوا۔انہوں نے پارلیمنٹ کو بتایا ’’9 دسمبر 2022 کو، PLAنے توانگ سیکٹر کے یانگستے علاقے میں ایل اے سی کی خلاف ورزی کرنے اور یکطرفہ طور پر جوں کی توں حیثیت تبدیل کرنے کی کوشش کی‘‘۔ وزیر دفاع نے کہا کہ چین کی اس کوشش کا ہمارے فوجیوں نے مضبوط اور پرعزم انداز میں مقابلہ کیا، اس کے بعد پیش آمدہ واقعات کے نتیجے میں ایک جسمانی جھڑپ ہوئی جس میں ہندوستانی فوج نے بہادری سے پی ایل اے کو ہمارے علاقے میں داخل ہونے سے روکا اور انہیں اپنی پوسٹوں پر واپس جانے پر مجبور کردیا،جھڑپ کے نتیجے میں دونوں جانب سے چند اہلکار زخمی ہوئے، میں اس ایوان کو بتاناچاہتا ہوں کہ ہماری طرف سے کوئی ہلاکت نہیں ہوئی ہے یا سنگین طور پر کوئی زخمی نہیں ہوا ہے۔وزیر دفاع نے کہا کہ بھارتی فوجی کمانڈروں کی بروقت مداخلت کی وجہ سے پی ایل اے کے سپاہی اپنے مقامات پر واپس چلے گئے۔ اس واقعے کی پیروی کے طور پر، علاقے کے مقامی کمانڈر نے 11 دسمبر 2022 کو اپنے ہم منصب کے ساتھ ایک فلیگ میٹنگ کی تاکہ اس مسئلے پر قائم شدہ طریقہ کار کے مطابق بات چیت کی جا سکے۔ چینی فریق سے کہا گیا کہ وہ ایسی کارروائیوں سے باز رہے اور سرحد پر امن و امان برقرار رکھے۔ اس معاملے کو سفارتی ذرائع سے چینی فریق کے ساتھ بھی اٹھایا گیا ہے۔راجناتھ سنگھ نے مزید کہاکہ میں اس ایوان کو یقین دلانا چاہتا ہوں کہ ہماری افواج ہماری علاقائی سالمیت کے تحفظ کے لیے پرعزم ہیں اور اس پر کی جانے والی کسی بھی کوشش کو ناکام بناتے رہیں گے۔ مجھے یقین ہے کہ یہ پورا ایوان ہمارے سپاہیوں کی بہادرانہ کوششوں کی حمایت میں متحد رہے گا۔
