عظمیٰ نیوز سروس
حیدرآباد//Tausch کمپنی کے شریک بانی اور ڈائریکٹر ڈاکٹر شرافت حسین نے مولانا آزاد نیشنل اردو یونیورسٹی کے مینجمنٹ ڈپارٹمنٹ سے ایم بی اے کا کورس مکمل کیا۔ یو جی سی کا نیٹ امتحان پاس کرنے کے بعد مولانا آزاد نیشنل اردو یونیورسٹی سے ہی ڈاکٹریٹ(پی ایچ ڈی) کی تعلیم مکمل کی اور ڈاکٹر شرافت حسین دبئی میں واقع ایک امریکی یونیورسٹی میں بطور پروفیسر کارگزار ہیں۔ ڈاکٹر شرافت حسین کے مطابق اردو یونیورسٹی سے اردو میں تعلیم حاصل کر کے ایک امریکی یونیورسٹی میں ملازمت کرتے ہوئے انہوں نے ثابت کیا کہ اردو میڈیم سے تعلیم کا حصول کسی طرح سے کوئی رکاوٹ نہیں بلکہ اردو طلبہ کو آگے بڑھنے میں مددگار ثابت ہوتی ہے۔ ڈاکٹر شرافت حسین کی طرح مانو سے فارغ بیشتر طلبا ملک و بیرون ملک اعلیٰ عہدوں پر خدمات انجام دے رہے ہیں۔پروفیسر عبدالعظیم، صدر شعبۂ مینجمنٹ و کامرس کے مطابق مولانا آزاد نیشنل اردو یونیورسٹی میں سال 2004ء میں ایم بی اے کا پروگرام پوسٹ گریجویٹ سطح پر شروع کیا گیا اور ابتداء سے ہی یہاں سے فارغ طلبہ کو روزگار مارکٹ میں بڑی آسانی سے ملازمتیں ملنے لگی ہیں۔ ان کے مطابق ایم بی اے کا ذریعہ تعلیم تو اردو ہی ہے مگرطلبہ کو انگریزی اور پرسنالٹی ڈیولپمنٹ اور دیگر مضامین میں بھی ماہر بنایا جاتا ہے۔ اے آئی سی ٹی ای کا سفارشی نصاب پڑھایا جاتا ہے جس کی وجہ سے مانو کے ایم بی اے پاس طلبہ نے اندرون ملک جاب مارکٹ میں کامیابی کے پرچم لہرائے۔ ساتھ ہی بیرون ممالک میں بھی انہوں نے اپنی صلاحیتوں کا لوہا منوا کر ثابت کیا کہ اردو میڈیم سے تعلیم طالب علم کو آگے بڑھنے میں کسی طرح کی رکاوٹ نہیں ہے۔اس شعبے کے تحت چار سالہ بی کام (آنرس / ریسرچ) بھی چلایا جاتا ہے۔ مانو کے ایم بی اے (پوسٹ گریجویٹ) پروگرام میں داخلہ کے لیے طالب علم کو کسی بھی مضمون میں 50 فیصد نشانات سے گریجویشن کامیاب ہونا لازمی ہے۔ اس کورس میں نشستوں کی کل تعداد 120 ہے۔ داخلہ انٹرنس میں رینک کی بنیاد پر دیئے جاتے ہیں۔
داخلہ فارم آن لائن یونیورسٹی کے پورٹل پر داخل کرنا ہوگا۔ درخواستیں داخل کرنے کی آخری تاریخ 13؍ مئی 2025 ہے۔ کورس کے متعلق مزید تفصیلات اور رہبری کے لیے ان فون نمبرات 9849325765 اور 9700911532 پر رابطہ کریں۔ غیر مقامی طلبہ کو ہاسٹل کی محدود گنجائش ہے۔ شعبۂ کامرس و مینجمنٹ کے تحت پوسٹ گریجویشن کی سطح پر ایم کام کا بھی کورس اردو میڈیم سے چلایا جارہا ہے۔ ایم کام میں نشستوں کی تعداد 40 ہے جس میں داخلہ میرٹ کی بنیاد پر دیئے جائیں گے۔ درخواست داخل کرنے کی آخری تاریخ 4؍ جون مقرر ہے۔
