اراضی بے دخلی مہم انتظامیہ ایل جی کی ہدایت پرسختی سے عمل پیرا،کسی غریب کوچھیڑانہیں جائے گا:ڈپٹی کمشنرسرینگر

بلال فرقانی

سرینگر// ضلع ترقیاتی کمشنر سرینگر نے بدھ کو کہا کہ انتظامیہ لیفٹیننٹ گورنر کی ہدایات پر سختی سے عمل کرے گی اور تجاوزات کے خلاف جاری مہم کے دوران کسی غریب اور بغیر اراضی لوگوں کو ہاتھ نہیں لگایا جائے گا۔ڈپٹی کمشنر سرینگر اعجاز اسد نے کہا کہ لیفٹیننٹ گورنر جموں و کشمیر نے بے دخلی مہم کے سلسلے میں سخت ہدایت جاری کی ہے کہ غریب اور بے زمینوں کو ہاتھ نہیں لگایا جانا چاہئے۔ انہوں نے کہا’’انتظامیہ ،لیفٹنٹ گورنر کی ہدایات پر عمل کر رہی ہیں اور یہ واضح ہے کہ انتظامیہ غریب اور بے زمین لوگوں کو ہاتھ نہیں لگائے گی۔‘‘جاری ترقیاتی کاموں پر بات کرتے ہوئے انہوں نے کہا کہ موسم کی بہتری کے پیش نظر لال چوک اور دیگر علاقوں میں جاری ترقیاتی کام رات کی شفٹ میں جاری رہیں گے۔ان کا کہنا تھا’’جاری کام مقررہ تاریخ پر مکمل ہوں گے اور موسمی حالات میں بہتری کے ساتھ یہ رات کی شفٹوں میں بھی کیا جائے گا۔

سوشل میڈیا پر پھیلائی گئی جعلی تجاوزات کی فہرست کے بارے میں، ڈپٹی کمشنر سری نگر نے کہا کہ سائبر پولیس نے پہلے ہی اس سلسلے میں نوٹس لیا ہے اور اس فعل میں ملوث افراد سے سختی سے نمٹا جائے گا۔انہوں نے یہ بھی کہا کہ جی20 کا اجلاس سری نگر میں ہونے جا رہا ہے، جو جموں و کشمیر بالخصوص سری نگر کے لوگوں کے لیے ایک قابل فخر لمحہ ہے۔خود کشی کے واقعات پیش آنے کے پیش نظر پلوں کی تار بندی کے بارے میں پوچھے جانے پر ان کا کہنا تھا کہ تار بندی سے خود کشی کے واقعات کم نہیں ہوسکتے ہیں اس کے لئے کونسلنگ کی ضرورت ہے۔انہوں نے کہا کہ والدین کو اپنا رول ادا کرنا چاہئے اور ہم ان واقعات سے نمٹنے کے لئے بنیادی وجوہات کو دیکھ رہے ہیں۔