عظمیٰ نیوز سروس
جموں// جموں و کشمیر کے ادھم پور حلقہ میں 19 اپریل کو ہونے والے لوک سبھا انتخابات کا نوٹیفکیشن بدھ کو جاری کیا گیا۔ادھم پور- کٹھوعہ حلقہ ملک بھر کے 102 حلقوں میں سے ایک حلقہ ہے جہاں پہلے مرحلے میں 19 اپریل کو پولنگ ہو رہی ہے۔کٹھوعہ کے ضلع مجسٹریٹ راکیش منہاس، جو اس حلقے کے ریٹرننگ افسر بھی ہیں، نے بدھ سے نامزدگی داخل کرنے کا نوٹیفکیشن جاری کیا۔منہاس نے کٹھوعہ میں نامہ نگاروں کو بتایا کہ کاغذات نامزدگی داخل کرنے کی آخری تاریخ 27 مارچ ہے۔ کاغذات کی جانچ پڑتال 28 مارچ کو ہوگی جبکہ امیدواری واپس لینے کی آخری تاریخ 30 مارچ ہے۔ابھی تک صرف بی جے پی اور ڈیموکریٹک پروگریسو آزاد پارٹی(ڈی پی اے پی) نے اس سیٹ کے لیے اپنے امیدواروں کا اعلان کیا ہے۔مرکزی وزیر جتیندر سنگھ بی جے پی کی طرف سے مقابلہ کر رہے ہیں جبکہ ڈی پی اے پی نے جی ایم سروڑی کو میدان میں اتارا ہے۔
