عظمیٰ نیوز ڈیسک
دہرادون//اتراکھنڈ کے الموڑا میں ایک بھیانک حادثے میں36لوگوں کی موت واقع ہوگئی۔ تقریبا ً40مسافروں سے بھری بس گہری کھائی میں گر گئی۔ یہ حادثہ گڑھوال رام نگر روٹ پر سالٹ کے قریب پیش آیا۔ مرنے والوں کی تعداد میں مزید اضافہ ہونے کا خدشہ ظاہر کیا جا رہا ہے۔ ایس ڈی آر ایف اور پولیس کی ٹیم جائے حادثہ پر پہنچ کر راحت و بچاو کام میں جٹ گئی ہے۔اطلاع کے مطابق پیر کی صبح گوری کھال سے ایک بس رام نگر کیلئے روانہ ہوئی تھی۔ بس میں 40سے زیادہ لوگ سوار تھے۔ سالٹ کے کوپی کے پاس ڈرائیور نے بس پر سے اپنا قابو کھو دیا جس کے بعد دیکھتے ہی دیکھتے بس گہری کھائی میں جا گری۔
بس کے گرتے ہی لوگوں کی چیخ و پکار شروع ہو گئی۔ حادثہ کے وقت کچھ مسافر باہر گر پڑے۔ زخمی مسافروں نے صبح قریب 9 بجے کنٹرول روم کو اس واقعہ کی اطلاع دی۔آفات انتظامیہ افسر ونیت پال نے بتایا کہ سالٹ اور رانی کھیت سے ٹیموں کو جائے حادثہ پر بھیجا گیا ہے۔ ان کے ذریعہ شروع میں 20لوگوں کے مرنے کی تصدیق کی گئی تھی۔ جس جگہ یہ واقعہ رونما ہوا وہ پوڑی-الموڑا سرحد کے قریب ہے۔ یہ علاقہ رام نگر کے نزدیک ہے۔اتراکھنڈ کے وزیر اعلی پشکر سنگھ دھامی نے اس دردناک واقعہ پر غم کا اظہار کیا ہے۔ انہوں نے کہا کہ الموڑا کے مارچولا میں ہوئے بس حادثہ میں مسافروں کی موت کی افسوسناک خبر ملی ہے۔ ضلع انتظامیہ کو تیزی سے راحت اور بچاو مہم چلانے کی ہدایت دی گئی ہے۔ جائے حادثہ پر مقامی انتظامیہ اور ایس ڈی آر ایف کی ٹیمیں زخمیوں کو نکال کر علاج کے لیے قریبی صحت مراکز تک پہنچانے کے لیے تیزی سے کام کر رہی ہیں۔ وزیر اعلی دھامی نے کہا کہ ضرورت پڑنے پر سنگین طور سے زخمی مسافروں کو ایئر لفٹ کرنے کے لیے بھی ہدایات دی گئی ہیں۔
گڈکری اورکانگریس کا اظہاررنج
یو این آئی
نئی دہلی//روڈ ٹرانسپورٹ اور شاہراہوں کے مرکزی وزیر نتن گڈکری نے اتراکھنڈ کے الموڑہ کے مارچولا میں پیش آئے بس حادثے پر گہرے رنج و غم کا اظہار کیا ہے اور متاثرین کے اہل خانہ سے تعزیت کا اظہار کیا ہے۔ گڈکری نے ٹویٹ کر کے اس واقع پر رنج و غم کا اظہار کرتے ہوئے کہا ’اتراکھنڈ کے الموڑہ میں بس حادثے میں کئی لوگوں کی موت کی خبر انتہائی افسوسناک اور تکلیف دہ ہے۔ ان کو میرا دلی خراج عقیدت۔ سوگوار خاندانوں کے ساتھ میری ہمدردیاں ہیں۔ میں زخمیوں کی جلد صحت یابی کیلئے دعا گو ہوں‘۔ادھر اتراکھنڈ کانگریس نے گہرے رنج و غم کا اظہار کیا ہے۔اتراکھنڈ کانگریس کے نائب صدر دھیریندر پرتاپ نے حادثہ کو انتہائی افسوسناک قرار دیتے ہوئے کہا کہ اس میں 45سے زیادہ لوگوں کی جانیں گئی ہیں۔ حکومت کی تمام ایجنسیوں سے جنگی پیمانے پر راحت اور بچا کا کام کرنے کی اپیل کرتے ہوئے انہوں نے کانگریس کارکنوں سے متاثرین کی مدد کرنے کی اپیل کی ہے۔
