یو این آئی
رانچی//اتراکھنڈ میں آج سے یکساں سول کوڈ (یو سی سی)نافذ ہونے جا رہا ہے۔ وزیر اعظم نریندر مودی کے اتراکھنڈ دورے سے ٹھیک پہلے دوپہر تقریبا 12:30 بجے اس قانون کو نافذ کر دیا جائے گا۔ اس قانون کے نافذ ہوتے ہی اترا کھنڈ یکساں سول کوڈ نافذ کرنے والی ملک کی پہلی ریاست بن جائے گی۔ افسروں کے مطابق یو سی سی کو پورے اتراکھنڈ میں نافذ کیا جائے گا۔ یہ قانون ریاست کے باہر رہنے والے اتراکھنڈ کے باشندوں پر بھی نافذ ہوگا۔ریاستی سکریٹریٹ میں یو سی سی پورٹل کا بھی آغاز ہوگا۔ اترا کھنڈ کے وزیر اعلی پشکر سنگھ دھامی اس تقریب کی قیادت کریں گے۔ ایک دن پہلے یعنی 26 جنوری کو وزیر اعلی دھامی نے کہا تھا کہ یو سی سی مذہب، جنس، ذات یا فرقہ کی بنیاد پر امتیازی سلوک سے آزاد ایک ہم آہنگ معاشرہ کی بنیاد رکھے گا۔ اس موقع پر انہوں نے بتایا کہ یو سی سی نافذ کرنے کے لیے سبھی ضروری تیاریاں مکمل کر لی گئی ہیں۔وزیر اعلیٰ دھامی نے کہا کہ یو سی سی سے سماج میں یکسانیت آئے گی اور سبھی شہریوں کے لیے یکساں حقوق و ذمہ داری یقینی ہوگی۔
انہوں نے آگے کہا “نریندر مودی کی قیادت میں ہم نے ریاست کے لوگوں سے 2022 کے اسمبلی انتخابات سے قبل یو سی سی لانے کا وعدہ کیا تھا۔ حکومت بننے کے بعد ہم نے اسے ترجیح دی۔ یو سی سی کا مسودہ تیار کیا گیا اور اس پر ایک قانون لایا گیا۔ اب ہم اس وعدے کو پوری طرح اور باضابطہ طور پر پورا کرنے جا رہے ہیں۔اس قانون کے نافذ ہونے کے بعد شادی کے رجسٹریشن سے لے کر طلاق تک سبھی دھرم اور مذہب کے لوگوں کے لیے قانون یکساں ہو جائیں گے۔ ساتھ ہی اتراکھنڈ میں لیو-اِن-ریلیشن شپ میں رہنے والے جوڑے کو بھی رجسٹریشن کروانا ہوگا۔ واضح ہو کہ ملک کی کئی سیاسی پارٹیوں، مذہبی تنظیموں اور مختلف اداروں نے اس قانون کی سخت مخالفت کی ہے اور اس کے نفاذ پر ناراضگی کا اظہار کیا ہے۔قابل ذکر ہے کہ مارچ میں دوبارہ اقتدار سنبھالتے ہی وزیر اعلی پشکر سنگھ دھامی کی قیادت میں کابینہ کی پہلی ہی میٹنگ میں یکساں سول کوڈ کی تجویز کو منظوری دیتے ہوئے اس کا مسودہ تیار کرنے کے لیے ماہرین کی کمیٹی کی تشکیل پر مہر لگائی تھی۔ سپریم کورٹ کی سبکدوش جج رنجنا پرکاش دیسائی کی صدارت میں 27 مئی 2022 کو ماہرین کی کمیٹی کی تشکیل کی گئی تھی۔
