عظمیٰ نیوز سروس
جموں// جموں کشمیر راج بھون نے کل جموں میں اتراکھنڈ یوم تاسیس کی تقریب کی میزبانی کی۔ طلباء، سیکورٹی اہلکار اور جموں و کشمیر یو ٹی میں رہنے والے ‘دیو بھومی’ کے نام سے مشہور ہمالیائی ریاست کے لوگ خصوصی مدعو تھے۔لیفٹیننٹ گورنر منوج سنہا نے اس موقع پر اتراکھنڈ کے لوگوں کو دل کی گہرائیوں سے مبارکباد اور نیک خواہشات کا اظہار کیا۔ انہوں نے اتراکھنڈ کے بہادروں اور بلند پایہ شخصیات کو خراج عقیدت پیش کیا جنہوں نے نسلوں کو ملک کی بے لوث خدمت کرنے کی ترغیب دی۔انہوں نے کہا کہ یوم تاسیس کی تقریب لوگوں کے درمیان تعلق کی عکاسی کرتی ہے اور ہمارے معاشرے، اتحاد اور قومی یکجہتی کے جامع تانے بانے کو مضبوط کرتی ہے۔لیفٹیننٹ گورنر نے کہا کہ اتراکھنڈ ملک کے حقیقی ہیروز کا مسکن ہے اور مختلف روحانی مقامات کا گھر ہے، جن میں چار دھامس- بدری ناتھ، کیدارناتھ، گنگوتری اور یمونوتری شامل ہیں۔انہوں نے کہا کہ یہ مبارک سرزمین حب الوطنی، روحانیت، فطرت، ثقافت، دستکاری، آرٹ، یوگا اور آیوروید کا کامل سنگم ہے۔ انہوں نے مزید کہا کہ ہمیں مختلف شعبوں میں اس کی نمایاں کامیابیوں پر واقعی فخر ہے۔اس موقع پر اتراکھنڈ کی بھرپور ثقافت اور روایات کی عکاسی کرنے والا ثقافتی پروگرام پیش کیا گیا۔
