عظمیٰ نیوز سروس
لکھن//وزیرِ دفاع راجناتھ سنگھ نے برہموس میزائل کو ”ہندوستان کی بڑھتی ہوئی سودیشی طاقت کی علامت” قرار دیتے ہوئے پاکستان کو خبردار کیا کہ اب اس کی ایک ایک انچ زمین برہموس کی پہنچ میں ہے ۔ ہفتے کے روز لکھنؤ میں وزیراعلیٰ یوگی آدتیہ ناتھ کے ساتھ راجناتھ سنگھ نے برہموس ایروسپیس کی مقامی اکائی میں تیار کردہ سپرسونک برہموس میزائلوں کے پہلے بیچ کو ہری جھنڈی دکھا کر روانہ کیا۔اس موقع پر وزیرِ دفاع نے کہا کہ ”دھن تیرس کے اس مبارک موقع پر چار میزائلوں کی ڈیلیوری کے ساتھ ہندوستان کی دفاعی صلاحیت اور خود انحصاری کو نئی بلندیوں پر پہنچانے والا یہ قدم نہ صرف فوجی کامیابی کی علامت ہے ، بلکہ اقتصادی خوشحالی اور روزگار کے مواقع پیدا کرنے کا بھی مظہر ہے ۔” وزیرِ دفاع نے کہا کہ ”برہموس صرف ایک میزائل نہیں بلکہ ہندوستان کی بڑھتی ہوئی سودیشی طاقت کی علامت ہے ۔ یہ روایتی وارہیڈ، جدید گائیڈڈ سسٹم اور سپرسونک رفتار کے ساتھ طویل فاصلے تک درست نشانہ لگانے کی صلاحیت رکھتا ہے ۔ رفتار، درستگی اور طاقت کا یہ امتزاج برہموس کو دنیا کے بہترین میزائل نظاموں میں شامل کرتا ہے ۔” انہوں نے آپریشن سندور کا ذکر کرتے ہوئے کہا کہ ”یہ محض لانچنگ ایونٹ نہیں بلکہ آنے والی نسلوں کے لیے ایک پیغام ہے کہ ہندوستان اپنے خوابوں کو حقیقت میں بدلنے کی صلاحیت رکھتا ہے ۔” آپریشن سندور میں برہموس نے نہ صرف اپنی تکنیکی برتری ثابت کی بلکہ یہ بھی دکھایا کہ یہ ہندوستان کی سلامتی کا سب سے بڑا عملی ثبوت ہے ۔ اس آپریشن نے یہ ثابت کر دیا کہ اب جیت ہمارے لیے کوئی اتفاقی واقعہ نہیں بلکہ ایک عادت بن چکی ہے ۔آپریشن سندور میں برہموس کا جو عملی مظاہرہ ہوا، اس نے نہ صرف ہندوستانی عوام بلکہ پوری دنیا میں برہموس پر ایک گہرا اعتماد اور یقین پیدا کیا ہے ۔ وزیرِ دفاع نے کہا کہ آپریشن سندور صرف ایک ٹریلر تھا، جس نے پاکستان کو یہ احساس دلا دیا کہ اگرہندوستان پاکستان کو جنم دے سکتا ہے ، تو وقت آنے پر وہ ۔۔۔۔ اس سے آگے مجھے کچھ کہنے کی ضرورت نہیں، آپ سب سمجھدار ہیں۔ انہوں نے کہا کہ اس کامیابی نے برہموس کو عالمی سطح پر ثابت کر دیا ہے ۔ ملک کو یہ یقین ہو گیا ہے کہ ہمارے دشمن اب برہموس کی مار سے نہیں بچ سکتے ۔ انہوں نے اقتصادی اثرات کے بارے میں کہا،”اس کا مطلب یہ ہے کہ ہر میزائل نہ صرف ہماری سرحدوں کی حفاظت کرتا ہے بلکہ ملک کی معیشت کو بھی مضبوط بناتا ہے ۔ تقریب کے دوران وزیر دفاع اور وزیراعلیٰ نے بوسٹر ڈاکنگ عمل کو بھی دیکھا۔ اسی سلسلے میں براہموس سیمولیٹر آلات کی پیشکش بھی کی گئی۔ اس کے علاوہ دونوں نے پودا لگانے کی تقریب میں بھی شرکت کی۔تقریب کے دوران، براہموس کے ڈائریکٹر جنرل ڈاکٹر جیتیرتھ آر جوشی نے وزیراعلیٰ یوگی آدتیہ ناتھ کو ایک چیک اور جی ایس ٹی بل پیش کیا، جس سے ریاستی حکومت کو آمدنی حاصل ہوگی۔ براہموس میزائلوں کی پیداوار سے اتر پردیش میں ہنر مند نوجوانوں کے لیے روزگار کے مواقع پیدا ہوں گے۔لکھنؤ میں واقع براہموس یونٹ یوپی ڈیفنس کاریڈور کا پہلا ایسا ادارہ ہے، جہاں میزائل سسٹم کی تیاری سے لے کر حتمی جانچ تک کا پورا عمل ملک میں ہی انجام دیا جاتا ہے۔ یہ منصوبہ نہ صرف تزویراتی لحاظ سے اہم ہے بلکہ ریاست میں روزگار، سرمایہ کاری اور تکنیکی جدت کے نئے مواقع بھی پیدا کر رہا ہے۔
