نیوز ڈیسک
سرینگر// جموں و کشمیر پولیس نے صحافیوں کو آن لائن دھمکی دینے کے معاملے کے سلسلے میں جمعرات کو وادی کے تین اضلاع میں سات مقامات پر تلاشی لی۔ پولیس نے بتایا کہ صحافیوں کو حالیہ آن لائن دھمکی کے سلسلے میں سرینگر پولیس کی مختلف ٹیموں نے وادی کشمیر کے تین اضلاع سرینگر، بڈگام اور پلوامہ میں سات مقامات کی تلاشی لی۔یہ چھاپے ایچ آئی جی کالونی بمنہ کے رہائشی آصف مقبول ڈار، بڈگام کے پوشکر کھاگ کے رہائشی اشفاق احمد ریشی ولد غلام نبی اور ثاقب حسین مغلو (صحافی) ولد غلام محمد لال بازار سری نگر کے گھروں پر مارے گئے۔ حاجی حیات احمد بٹ کشمیر ریڈر (روزنامہ اخبار) پانپور پلوامہ کے مالک، شوکت احمد موٹا بڈشاہ محلہ لین نمبر 1 لال بازار سری نگر اور دفتر کشمیر ریڈر (اخبار) سر نگر میں بھی چھاپے مارے گئے۔سرینگر پولیس کی ٹیموں نے ان چھاپوں کے دوران موبائل، سی ڈیز، دیگر ڈیجیٹل آلات، دستاویزات، بینک کے کاغذات کے علاوہ دیگر مشتبہ کاغذات بھی ضبط کئے۔سرینگر پولیس نے بھی ایک ٹویٹ میں تصدیق کی اور کہا کہ چھاپے سرینگر، بڈگام اور پلوامہ اضلاع میں مارے جا رہے ہیں۔اس میں کہا گیا ہے کہ تلاشیاں اسی معاملے میں کچھ دن پہلے کی گئی تلاشیوں سے حاصل ہونے والی لیڈز کے بعد تھیں۔قبل ازیں سرینگر پولیس نے ایف آئی آر نمبر 82/2022میں کشمیر بھر میں 12 مقامات پر چھاپے مارے، جو پولیس اسٹیشن شیرگھڑی میں درج کی گئی تھی۔ اس میں کہا گیا ہے کہ جاری تلاشیاں اسی کیس میں کچھ دن پہلے اسی طرح کی تلاشی کے دوران موصول ہونے والی لیڈز کے بعد کی گئیں۔
