عظمیٰ نیوز سروس
لکھنو//ایودھیا سے دہلی جانے والی ایودھیا ایکسپریس (1420)ٹرین میں جمعہ یعنی7مارچ کی شام اس وقت ہنگامہ ہوا جب ایک نوجوان ٹرین کے بیت الخلاء میں داخل ہوا اور بھاگ کر اپنے ساتھی مسافروں کو بتایا کہ بیت الخلاء کی دیوار پر دھمکی لکھی ہوئی ہے۔ کسی نے دیوار پر لکھا ہے کہ جب یہ ٹرین لکھنوکے چارباغ اسٹیشن پر پہنچے گی تو اسے آر ڈی ایکس بم سے اڑا دیا جائے گا۔مسافروں نے فوری طور پر ٹرین میں موجود ریلوے عملے کو اس کی اطلاع دی جس کے بعد ریلوے عملے نے ریلوے انتظامیہ کو اس کی اطلاع دی۔ اس معاملے کو انتہائی سنجیدگی سے لیتے ہوئے ریلوے کے اعلی حکام نے ٹرین کو بارہ بنکی اسٹیشن پر روکنے کا حکم دیا، جس کے بعد جانچ کیلئے ٹرین کو اگلے اسٹیشن یعنی بارہ بنکی اسٹیشن پر روک دیا گیا۔بارہ بنکی میں تقریباً 7:25بجے ٹرین کو روکنے کے بعد ٹرین کی مکمل تلاشی اور جانچ شروع کی گئی۔ سب سے پہلے تمام مسافروں کو ٹرین سے اتارا گیا۔ اس کے بعد، جی آر پی، آر پی ایف اور سیول پولیس اہلکاروں نے ملٹری بم ڈسپوزل ٹیم کے ساتھ مل کر ٹرین کے ڈبوں کی تلاشی اور چھان بین شروع کی۔یہ دھمکی ایودھیا ایکسپریس کے کوچ نمبر S-8 کے بیت الخلاء میں لکھی گئی تھی۔ تقریبا دو گھنٹے تک جاری رہنے والی تفتیش کے دوران بارہ بنکی ریلوے اسٹیشن پر سپرنٹنڈنٹ آف پولیس اور کلکٹر سمیت پولیس کی بھاری نفری موجود تھی۔ تحقیقات سے معلوم ہوا کہ یہ دھمکی کسی نے شرارت کے طور پر لکھی تھی اور ٹرین مکمل طور پر محفوظ ہے۔ ٹرین میں مسافروں کو سوار کرنے کے بعد، ٹرین کو رات 9.25 بجے آگے کے سفر کے لیے بھیج دیا گیا۔
