آر پار بس سروس پر تعطل برقرار

راجوری //چکاں داباغ پونچھ کے راستے ہر سوموار کو چلنے والی کاروان امن بس سروس مسلسل چوتھے ہفتے بھی معطل رہی۔ذرائع نے بتایاکہ پاکستانی زیر انتظام کشمیر سے تعلق رکھنے والے تمام مسافر پونچھ سپورٹس اسٹیڈیم پہنچے جہاںسے یہ بس سروس راولاکوٹ کیلئے نکلتی ہے لیکن پچھلے تین ہفتوںسے چلا آرہا تعطل آج بھی برقرار رہا اور بس سروس بحال نہ ہوسکی جس کے بعد ان لوگوں کوواپس بھیج دیاگیا۔کراس ایل او سی ٹریڈ کے کسٹوڈین تنویر احمد نے بتایاکہ اس سوموار کو بھی آر پار بس سروس بحال نہیں ہوسکی اور یہ مسلسل چوتھا ہفتہ گزر گیاہے۔یہ بات قابل ذکر ہے کہ چار ہفتے قبل اس وقت بس سروس اور تجارت کو معطل کردیاگیاتھا جب پونچھ کے دیگر سیکٹروں کی طرح چکاں داباغ میں بھی ہندوپاک افواج کے درمیان زبردست فائرنگ اور گولہ باری کا تبادلہ ہوا۔بس سروس بحال نہ ہونے کی وجہ سے پونچھ میں پاکستانی زیر انتظام کشمیر سے تعلق رکھنے والے 116مسافر درماندہ ہیں جبکہ جموں کشمیر کے 3مسافر اُس پار پھنسے ہوئے ہیں ۔ پونچھ سے ہر پیر کو چلنے والی پونچھ راولاکوٹ ’راہِ ملن‘ آج مسلسل چوتھی مرتبہ معطل رہی۔ انہوں نے بتایا ’پاکستان انتظامیہ نے اس کے زیر قبضہ کشمیر کے رہائشیوں کو لیکر جارہی امن بس کے لئے دروازے نہیں کھولے‘۔ انہوں نے بتایا ’سرحد پار انتظامیہ سے مزید کاروائی کی اپیل کی گئی ہے تاکہ سرحد کے دونوں اطراف پھنسے لوگ اپنے گھروں کو واپس جاسکیں‘۔ ضلع پونچھ میں پھنسے پاکستان زیر قبضہ کشمیر کے رہائشیوں نے گذشتہ پیر کو بس سروس کی معطلی پر اپنے غصے کا اظہار کرتے ہوئے انتظامیہ کے خلاف احتجاج کیا تھا۔ سرکاری ذرائع نے بتایا ’پونچھ راولاکوٹ بس جو کہ ہر پیر کو ضلع پونچھ اور پاکستان زیر قبضہ کشمیر کے ضلع راولاکوٹ کے درمیان چلتی ہے، کو چار ہفتے قبل سرحدی کشیدگی کے پیش نظر احتیاطی اقدامات کے طور پر معطل کیا گیا تھا‘۔ ذرائع نے سری نگر مظفرآباد بس سروس کی معطلی کے حوالے سے بتایا ’ہمیں پاکستان انتظامیہ سے ایک پیغام موصول ہوا جس میں یہ کہتے ہوئے بس سروس معطل رکھنے کی استدعا کی گئی کہ پاکستان کے زیر قبضہ کشمیر میں آج اس کے پہلے صدر سردار محمد ابراہیم خان کی چودہویں برسی کے موقع پر عام تعطیل ہے‘۔ انہوں نے بتایا ’دونوں طرف کی انتظامیہ نے بس سروس کو آج معطل رکھنے کا فیصلہ متفقہ طور پر لیا ہے‘۔ سرکاری ذرائع نے بتایا کہ آج سفر کرنے والے لوگوں کو فیصلے سے آگاہ کیا گیا ہے اور انہیں اب اگلے ہفتے چلنے والی بس میں ایڈجسٹ کرلیا جائے گا۔ دریں اثنا ایل او سی کے آر پار جموں وکشمیر اور پاکستان زیر قبضہ کشمیر کے درمیان سری نگر۔ مظفرآباد روڑ کے ذریعے ہونے والی تجارت 25 جولائی سے بدستور معطل پڑی ہوئی ہے۔ سرکاری ذرائع نے بتایا ’سرحد پار مظفر آباد کی انتظامیہ نے 25 جولائی کو ہمیں ایک مکتوب بھیجا جس میں آر پار تجارت کو ایک ہفتے تک معطل رکھنے کی بات کہی گئی تھی ‘۔ انہوں نے بتایا ’مظفرآباد کی انتظامیہ نے مکتوب میں تجارت کی معطلی کی کوئی وجہ ظاہر نہیں کی تھی‘۔ مظفرآباد انتظامیہ کی طرف سے آر پار تجارت کی معطلی کا فیصلہ وہاں سے آنے والے ٹرک سے ساڑھے 66 کلو گرام ہیروئن کی برآمدگی کے چار دن بعد سامنے آیا تھا۔ ذرائع نے بتایا ’ 21 جولائی کو جس ٹرک سے ہیروئین برآمد ہوئی تھی، کے ڈرائیور سید یوسف ولد علی اکبر کو حراست میں لیا گیا تھا اور اس سے پوچھ گچھ کا سلسلہ جاری ہے‘۔