پرویز احمد
سرینگر //ریاستی ہیلتھ ایجنسی (SHA)نے جموں و کشمیر کے مختلف ہسپتالوں میں مالی بے ضابطگیوں اور مریضوں سے رقومات حاصل کرنے کے الزام میں 5ہسپتالوں میںآیوشمان بھارت سہولیات کو 6ماہ کیلئے معطل کرنے کے علاوہ ان پر جرمانہ بھی عائد کیا ہے تاہم ان ہسپتالوں میں گردوں کے مریضوں کیلئے ڈائلاسز کی سہولیات جاری رہیں گی۔ معلوم ہوا ہے کہ سٹیٹ ہیلتھ ایجنسی نے جموں اور کشمیر میں5نجی ہسپتالوں کا نومبر میں معائنہ کیا اور معائنہ کے دوران 5ہسپتالوں میں بے ضابطگیاں اور آیوشمان کارڈ استعمال کرنے کے باوجود بھی مریضوں سے پیسے وصول کئے گئے ہیں۔سٹیٹ ہیلتھ ایجنسی سے صوبہ کشمیر کے دونجی ہسپتالوں (شفا اور فلورنس) کے معائنہ کے دوران کئی بے ضابطگیاں پائی گئیں جن میں مریضوں سے رقومات حاصل کرنا ور دیگر معاملات شامل ہیں۔ آیوشمان بھارت کے ذرائع نے بتایا کہ شفا ہسپتال پر 26لاکھ 15ہزار اور فلورنس ہسپتال پر 2لاکھ 97ہزار روپے کا جرمانہ عائد کیا گیا۔ ذرائع کا کہنا ہے کہ صوبہ جموںکے انکو رمتریکا سوود آئی کلنک اور گیل ایس ایم ہسپتال کی آیوشمان خدمات سروسز کوبھی چھ ماہ کیلئے معطل کردیا ہے جبکہ دونوں ہسپتالوں پر بھی جرمانہ عائد کیا گیا ۔ سٹیٹ ہیلتھ ایجنسی کی ترجمان نورین راجا نے کشمیر عظمیٰ کو بتایا کہ معطلی کے دوران ڈائلاسز خدمات جاری رہیں گی لیکن کسی نئے ڈائلاسز مریض کا ان ہسپتالوں میں اندراج نہیں ہوگا۔ یہ بات قابل ذکر ہے کہ مذکورہ ہسپتالوں کے خلاف پچھلے کئی برسوں سے شکایات موصول ہورہی تھیں۔
