۔4ٹاوروں کے گرنے کی تحقیقات کا حکم

 

جموں//چیف سیکریٹری بی و ی آر سبھرامنیم نے موسم سرما کے دوران پیدا ہونے والی ممکنہ ہنگامی صورتحال سے نمٹنے کیلئے متعلقہ محکموں کو ایک جامع منصوبہ ترتیب دینے کی ہدایت دی ہے تاکہ لوگوں کو مشکلات کا سامنانہ کرنا پڑے ۔ریاست میں حال ہی میں ہوئی برفباری اور بارشوں سے تباہ شدہ لازمی خدمات کی بحالی کے لئے انتظامیہ کی طرف سے کئے جارہے اقدامات کا تفصیلی جائزہ لیتے ہوئے انہوں نے کہا’’ ایکشن پلان میں برف ہٹانے کی مشینیں ، وسائل کی مد ،اشیائے ضروریہ کی دستیابی ،کنٹرول روم کا قیام اور ایس ڈی آر ایف کو متحرک کرنے کو شامل کیا جانا چاہیے ‘‘ ۔چیف سیکرٹری نے صوبائی کمشنرکشمیر اور وادی اور لداخ خطے کے تمام ترقیاتی کمشنروں سے ویڈیو کانفرنسنگ کے ذریعے بجلی ، سڑک رابطوں ، پانی اور صحت خدمات کے بارے میں تازہ ترین جانکاری حاصل کی۔چیف سیکرٹری نے کہا کہ حکومت مرکزی حکومت سے رابطہ قائم کرے گی تاکہ بین محکمہ جاتی افسروں کی ایک ٹیم وادی بھیجی جائے تاکہ ایس ڈی آر ایف قوانین کے مطابق متاثرین کو فوری معاوضہ دیا جاسکے ۔انہوں نے متعلقہ حکام کو ہدایت دی کہ وہ جائیداد اورفصلوں کو پہنچے نقصان کا بنیاد ی سطح پر تخمینہ لگانے کا کام شروع کریں۔ انہوں نے کہا کہ ایس ڈی آر ایف کے تحت ڈپٹی کمشنر وں کے پاس مناسب رقومات دستیاب ہے ۔چیف سیکرٹری نے ڈویژنل کمشنر اور ڈپٹی کمشنر وں پر زور دیا کہ وہ تمام علاقوں میں بجلی کے بنیادی ڈھانچے کو بحال کرنے کے لئے لازمی اقدامات کریں ۔اُنہوں نے چار ٹاوروں کے گرنے کے معاملے کی تحقیقات کرنے کی بھی ہدایت دی اور کہا کہ انکوائری رِپورٹ دو تین دنوں کے اندر پہنچ جانی چاہیے۔ اس موقعہ پر بتایا گیا کہ بجلی ٹرانسفارمروں کی مرمت اور دیگر بنیادی ڈھانچے کو بحال کرنے کے لئے عبوری طور پر پانچ کروڑ روپے واگذار کئے گئے ہیں۔کمشنر سیکرٹری خوراک ، سول سپلائز اور عوامی تقسیم کاری کو ہدایت دی گئی کہ وادی میں غذائی اجناس، رسوئی گیس،تیل خاکی اور دیگر چیزوں کا وافر سٹاک دستیاب کرائیں۔ڈویژنل کمشنر کشمیر بصیر احمد خا ن نے صورتحال کے بارے میں تفصیلات دیتے ہوئے کہا کہ اکثر علاقوں میں بجلی بحال کی گئی جبکہ دیگر علاقوں میں متبادل انتظامات کئے گئے ہیں۔ اُنہوں نے کہا کہ لازمی خدمات کو بحال کرنے کے لئے تمام عملے اور مشینر ی کو متحرک کیا گیا ہے ۔اُنہوں نے کہا کہ اِنتظامیہ زمینی سطح پر باہمی رابطے کے ساتھ کام کررہی ہے۔