۔2019میں کانگریس بڑی پارٹی بنتی ہے تو میں وزیراعظم بننے کو تیار ہوں:راہل گاندھی

بنگالورو//صدر کانگریس راہل گاندھی نے کہا ہے کہ اگر 2019کے انتخابات میں ان کی پارٹی واحد بڑی جماعت بن کر ابھرتی ہے تو وہ وزیراعظم بنیں گے ۔انہوں نے بنگالورو میں اہم شخصیتوں سے خطاب کرتے ہوئے یہ بات کہی۔جب ان سے پوچھا گیا کہ آیا وہ وزیراعظم بنیں گے تو انہوں نے اس کا جواب دیتے ہوئے کہا کہ یہ سب کچھ کانگریس پارٹی کے مظاہرہ پر منحصر ہے ۔راہل گاندھی نے آئندہ سال ہونے والے انتخابات میں کانگریس کو اکثریت حاصل ہونے پر وزیراعظم بننے کا دوسری مرتبہ اشارہ دیا ہے ۔گزشتہ سال ستمبر میں میں امریکہ کی برکلی یونیورسٹی میں طلبہ سے خطاب کے دوران راہل نے کہا تھا کہ 2019کے عام انتخابات کے لئے وزیراعظم کا امیدوار بننے کے لئے وہ تیار ہیں۔اس ماہ کے اوائل میں راہل گاندھی نے دعوی کیا تھا کہ بی جے پی 2019کے انتخابات میں کامیاب نہیں ہوگی اور وزیراعظم مودی متحدہ اپوزیشن کے سبب وارنسی کی نشست سے شکست کھائیں گے ۔راہل نے کرناٹک کی انتخابی مہم کے سلسلہ میں بنگالورو میں میڈیا سے با ت کرتے ہوئے کہا ہے کہ امیت شاہ قتل کے ملزم ہیں۔ان کی کوئی ساکھ نہیں ہے ۔بی جے پی جوایمانداری ،شرافت کی بات کرتی ہے ، کا صدر ایسا شخص ہے جو قتل کاملزم ہے ۔انہوں نے یدی یورپا کو وزیراعلی کا امیدوار بنانے بی جے پی کے فیصلہ پر سوال اٹھائے ۔اس سوال پر کہ آیا2019کے انتخابات میں کانگریس کے واحد بڑی جماعت کے طورپر ابھرنے پر وہ وزیراعظم بنیں گے تو راہل نے کہا کہ کیوں نہیں۔ایک سوال کے جواب میں راہل نے کہاکہ یہ سب کانگریس پارٹی کے مظاہرہ پر منحصر ہے ۔اگر کانگریس واحد بڑی جماعت بن کر ابھرتی ہے تو اس سوال کا جواب ہے ہاں۔انہوں نے کہاکہ ہم وزیراعظم سے بار بار یہ پوچھ رہے ہیں کہ انہوں نے رشوت خور شخص کاانتخاب وزیراعلی کے امیدوار کے طورپر کیوں کیا؟انہوں نے ایسے شخص کاانتخاب کیوں کیا جو جیل میں رہ چکا ہے ۔ انہوں نے بی جے پی پر نکتہ چینی کرتے ہوئے کہا کہ ہندوستان کے تمام اداروں پر قبضہ جمانے کی آرایس ایس ۔بی جے پی کی جانب سے منظم انداز میں کوشش کی جارہی ہے ۔وہ تمام اداروں کو نشانہ بنارہے ہیں اور کانگریس پارٹی و اپوزیشن ان کی ان کوششوں کی مزاحمت کر رہے ہیں ۔ملک کے عوام بھی ان کی مزاحمت کر رہے ہیں۔وزیراعظم نے بنگالورو کے نوجوانوں کو ملازمتوں کا وعدہ کیا تھا تاہم ان کے خود کے وزرا نے اعتراف کیا ہے کہ بے روزگار ی ریکارڈ سطح پر پہنچ گئی ہے ۔میں ان سے پوچھنا چاہتا ہوں کہ انہوں نے دفاعی شعبہ میں 64سالہ سے کام کرنے والی کمپنی ایچ اے ایل سے رافیل کی معاملت کیوں حاصل کرلی اور یہ معاملت ان کے دوست کو کیوں دی گئی؟میں وزیراعظم سے یہ پوچھنا چاہتا ہوں کہ وہ کسانوں کے مسائل پر کیوں خاموش ہیں ۔کانگریس نے کسانوں کے 8000کروڑ روپئے کے قرض معاف کئے ۔مرکز نے کیا کیا؟راہل گاندھی نے سمودرا بھارت فاونڈیشن کے آغاز کے موقع پر بنگالورو کے عوام سے بھی ملاقات کی اور ان سے تبادلہ خیال کیا۔یواین آئی