عظمیٰ نیوزسروس
جموں// فوج کے بیڑے کے پاس اب ایک پرندے سے بھی چھوٹا ڈرون ہے، جسے بلیک ہارنیٹ نینو کہا جاتا ہے۔ ڈرون کی جموں کے اکھنور میں ٹانڈہ آرٹلری ڈویڑن میں نویں ویٹرنز ڈے کی تقریب میں نمائش کی گئی۔ سیکورٹی حکام نے بتایاکہ یہ ڈرون فوج کو دراندازی کی کوششوں کو ناکام بنانے میں مدد دے گا اور دشمن پر خاص طور پر پاکستان کے ساتھ سرحدی علاقوں پر گہری نظر رکھے گا۔انہوںنے کہاکہ بلیک ہارنیٹ ڈرون ایک چھوٹے بچوں کے کھلونے کی طرح دکھائی دیتا ہے جبکہ اس میں 2کیمرے لگے ہوئے ہیں۔ یہ نینو ڈرون توجہ کا موضوع بن گیا ہے۔ چند گرام وزنی اور ہتھیلی سے چھوٹا، بھارتی فوج کا بلیک ہارنیٹ نینو ڈرون اب ملی ٹنٹوں کی تلاش میں اہم رول ادا کرنے والا ہے۔ سیکورٹی حکام نے بتایاکہ بلیک ہارنیٹ نینو ڈرون خاص طور پر کمپیکٹ ہے، جس کی لمبائی 16 سینٹی میٹر اور چوڑائی 2.5 سینٹی میٹر ہے۔انہوںنے بتایاکہ یہ فوج کی جانب سے استعمال ہونے والا سب سے چھوٹا ڈرون ہے۔ اس کا وزن بیٹری کے ساتھ صرف 18 گرام ہے، یہ سپاہیوں کو ایک ہلکا سا نگرانی کا آلہ فراہم کرتا ہے جسے آسانی سے لے جایا جاسکتا ہے۔سیکورٹی حکام نے بتایاکہ یہ ڈرون فوجیوں کو فوری حالات سے متعلق آگاہی فراہم کرنے کیلئے ڈیزائن کیا گیا ہے، اس کا چھوٹا سائز اور خاموشی اسے تقریباً ناقابل شناخت بناتی ہے۔ بلیک ہارنیٹ کو حال ہی میں جموں و کشمیر میں فوج نے اپنے بیڑے میں شامل کیا ہے۔ دو کیمروں سے لیس بلیک ہارنیٹ بغیر کسی آواز کے تصادم کے دوران چھپے ہوئے ملی ٹنٹوں کی نشاندہی کرسکتا ہے۔ فوج اس ڈرون کو ملی ٹنٹوںکی پوزیشن جاننے کے لیے استعمال کرتی ہے۔
