پرویز احمد
سرینگر //جموں و کشمیر میں پچھلے 24گھنٹوں کے دوران کورونا وائرس کی تشخیص کیلئے 24ہزار 275ٹیسٹ کئے گئے جن میں 2مسافروں سمیت مزید 12افراد کی رپورٹیں مثبت آئی ہیں۔ متاثرین کی مجموعی تعداد 4لاکھ 53ہزار 827ہوگئی ہے۔ اس دوران جموں و کشمیر میں مسلسل 22ویں دن بھی کورونا وائرس سے کسی کی موت نہیں ہوئی ہے ۔ متوفین کی مجموعی تعداد 4750بنی ہوئی ہے۔ محکمہ صحت کی جانب سے فراہم کئے گئے اعداد و شمار کے مطابق جموں و کشمیر میں کورونا وائرس سے 12افراد متاثر ہوئے ہیں جن میں جموں میں 1جبکہ دیگر 11افراد مقامی سطح پر رابطے میں آنے کی وجہ سے متاثر ہوئے ہیں۔ کشمیرکے 8اضلاع جن میں بارہمولہ ، بڈگام،پلوامہ، کپوارہ، اننت ناگ، گاندربل، کولگام اور شوپیان میں کسی کی رپورٹ مثبت نہیں آئی ہے جبکہ دیگر 2اضلاع میں 12افراد کو مثبت قرار دیا گیا ہے۔ کشمیر میں مثبت قرار دئے گئے 12افراد میں سرینگر میں 10اور بانڈی پورہ میں ایک کی رپورٹ مثبت آئی ہے ۔ کشمیر میں متاثرین کی مجموعی تعداد 2 لاکھ 87ہزار 554ہوگئی ہے۔ اس دوران کشمیر میں مسلسل 34ویں دن بھی کسی کی رپورٹ مثبت نہیں آئی ہے۔ متوفین کی مجموعی تعداد 2423بنی ہوئی ہے۔ جموں صوبے کے 9اضلاع جن میں ادھم پور، راجوری ، ڈوڈہ، کٹھوعہ، سانبہ، کشتواڑ، پونچھ، رام بن اور ریاسی میں کسی کی رپورٹ مثبت نہیں آئی ہے جبکہ ضلع جموں میں ایک شخص کو مثبت قرار دیا گیا ہے جو بیرون ریاستوں کا سفر کرکے واپس لوٹا ہے۔ جموں صوبے میں متاثرین کی مجموعی تعداد 1لاکھ 66ہزار 273ہوگئی ہے۔ اس دوران جموں صوبے میں مسلسل 22ویں دن بھی کورونا وائرس سے کسی کی موت نہیں ہوئی ہے۔ متوفین کی مجموعی تعداد 2327بنی ہوئی ہے۔
