عظمیٰ نیوزسروس
جموں//بھارتیہ جنتا پارٹی جموں کشمیرصدر رویندر رینا نے پارٹی ہیڈکوارٹر، تریکوٹہ نگر، جموں میں ایک پریس کانفرنس سے خطاب کرتے ہوئے بتایا کہ پارٹی کے دس ہزارسے زائد کارکنان اس مہینے 08 سے 10 فروری تک “گاؤں چلو ابھیان” کے تحت یوٹی کے مختلف دیہی اور شہری علاقوں میں پہنچیں گے اورپارٹی کے یہ کارکنان مقامی رہائشیوں کے ساتھ بات چیت کرنے کے لیے کسی خاص گاؤں یا میونسپل وارڈ میں کم از کم 24 گھنٹے گزاریں گے۔رینا کے ساتھ بی جے پی کے نائب صدر اور پروگرام انچارج پون کھجوریا، سابق وزیر اور این ای ایم پریا سیٹھی، پروگرام کے شریک انچارج اور سینئر لیڈر سنجے بارو، اور میڈیا ریلیشن ڈیپارٹمنٹ کے شریک انچارج بلبیر رام رتن تھے۔رویندر رینا نے کہا کہ بی جے پی ایک ملک گیر میگا مہم “گاؤں چلو ابھیان” شروع کر رہی ہے اور جموں و کشمیر کے مرکز کے زیر انتظام علاقے میں، یہ اس ماہ 08 سے 10 فروری تک شروع کی جائے گی، اور دیہی علاقوں کے ہر گاؤں اور یوٹی کے شہری علاقوں میں ہر وارڈکا احاطہ کرے گی۔اس میگا مشق کے کامیاب انعقاد کے لیے پارٹی اپنے ایم پیز، سابق وزراء، ریاستی عہدیداران، سابق ایم پیز، سابق ایم ایل اے اور ایم ایل سی، سابق بی ڈی سی چیئرپرسن، موجودہ ڈی ڈی سی چیئرپرسن اور وائس چیئرپرسن، سابق وی سی، ڈی ڈی سی ممبران، عہدیداروں، مورچہ ٹیموں، سرپنچ، پنچ حصہ لینگے۔رویندر رینا نے مزید کہا کہ اس 3 روزہ ابھیان کا مقصد مقامی باشندوں، مودی حکومت کی اسکیموں سے فائدہ اٹھانے والوں، غیر بی جے پی پارٹیوں کے لیڈروں، سیلف ہیلپ گروپس، این جی اوز، ریٹائرڈ ملازمین، تاجر برادری اور دیگر ممتاز لوگوں سے ملنا ہے۔ گاؤں یا وارڈ کا دورہ کرنے والے پارٹی کارکن مرکزی حکومت کی فلاحی اسکیموں اور غریبوں، ضرورت مندوں کی زندگیوں پر ان کے اثرات کے بارے میں رائے طلب کریں گے اور سکیموں کو مزید نافذ کرنے کے لیے تجاویز، اگر کوئی ہیں، مرتب کریں گے۔ وہ لوگوں کے سامنے بی جے پی کا رپورٹ کارڈ بھی رکھیں گے اور انہیں آئندہ انتخابات میں بی جے پی کی حمایت کرنے کی ضرورت سے آگاہ کریں گے تاکہ نریندر مودی مسلسل تیسری مدت کے لیے وزیر اعظم کی کرسی سنبھالیں اور فلاحی سکیموں کو مزید تیز کریں۔
