سمت بھار گو +رمیش کیسر +عظمیٰ یاسمین+حسین محتشم
راجوری +پونچھ //راجوری اور پونچھ کے ضلعی ہیڈکوارٹرز پر یوم جمہوریہ کی تقریبات کے لئے فل ڈریس ریہرسل کا انعقاد کیا گیا۔راجوری میں یہ ریہرسل ڈسٹرکٹ پولیس لائنز میں منعقد ہوئی، جہاں ایڈیشنل ڈپٹی کمشنر (اے ڈی سی) راجیو کمار کھجوریہ نے قومی پرچم لہرایا اور سی آر پی ایف، آئی آر پی، جے کے پی، ایف پی ایف اور اسکول سکواڈز سمیت مختلف دستوں کی شاندار پریڈ پر سلامی دی۔اے ڈی سی نے پریڈ کا معائنہ کیا، بینڈ ڈرل کا جائزہ لیا، اور مارچ پاسٹ میں شریک دستوں کی کارکردگی کا مشاہدہ کیا۔اس موقع پر ایڈیشنل سپرنٹنڈنٹ آف پولیس (اے ایس پی) وکرم کمار، ڈی ایس ای او سندیپ شرما، ڈی آئی او عاشق رفیق ملک، سی ای او بشمبر داس، تحصیلدار ورندر شرما، ایگزیکٹو انجینئر پی ڈی ڈی محمد رشید، ایگزیکٹو انجینئر پی ڈبلیو ڈی (آر اینڈ بی) راجوری سردار خان، اور دیگر افسران موجود تھے۔ اسی طرح نوشہرہ سب ڈویژن میں بھی پروگرام منعقد کیا گیا ۔ہائر سیکنڈری سکول بوائز نوشہرہ میں جمعہ کے روز یوم جمہوریہ کی تقریب کے سلسلے میں فل ڈریس ریہرسل کا انعقاد کیا گیا، جس میں سرکاری اور نجی سکولوں کے بچوں نے بھرپور شرکت کی۔اس موقع پر سکول کے طلباء نے مختلف قومی رنگوں میں پریڈ کی، اور اساتذہ و اسکول انتظامیہ کے ہمراہ اس تقریب کو کامیاب بنانے میں اہم کردار ادا کیا۔ ریہرسل کے دوران بچوں نے شاندار ڈسپلن کا مظاہرہ کرتے ہوئے مختلف فوجی دستوں کی طرح ترتیب میں پریڈ کی، جسے حاضرین نے خوب سراہا۔مہمان خصوصی کی حیثیت سے آفیسران نے پریڈ کا معائنہ کیا اور بچوں کی محنت کو سراہا۔ اس موقع پر قومی ترانہ بھی انتہائی عقیدت کے ساتھ گایا گیا، جس سے پورے سکول میں ایک قومی جذبہ پیدا ہوا۔یوم جمہوریہ کی تقریب کے لیے ہونے والی اس فل ڈریس ریہرسل نے بچوں کو نہ صرف اپنی صلاحیتوں کے اظہار کا موقع دیا بلکہ انہیں قومی دن کی اہمیت سے بھی آگاہ کیا۔ اس تقریب کا مقصد یوم جمہوریہ کی اصل تقریب کے لیے تیاریاں مکمل کرنا تھا، تاکہ اس دن کو مکمل جوش و جذبے کے ساتھ منایا جا سکے۔ضلع راجوری کے سب ڈویژن تھنہ منڈی میں بھی روایتی جوش و جذبے اور حب الوطنی کے جذبے کے ساتھ یوم جمہوریہ کی تقریب کے لئے فل ڈریس ریہرسل کا انعقاد کیا گیا۔
اس موقع پر گورنمنٹ ڈگری کالج تھنہ منڈی میں فل ڈریس ریہرسل کی شاندار تقریب منعقد ہوئی جس میں تحصیلدار تھنہ منڈی سید مظہر علی شاہ نے پرچم کشائی کی رسم انجام دی اور پریڈ پر سلامی بھی لی۔ اس موقع پر تحصیلدار سید مظہر علی شاہ، زونل فزیکل ایجوکیشن آفیسر سلیم نوشاد رینہ اور این سی سی کوآرڈی نیٹر پروفیسر الطاف حسین وغیرہ نے پریڈ کا معائنہ کیا جس میں تھنہ منڈی کے مختلف تعلیمی اداروں سے تعلق رکھنے والے طلباء نے شاندار پریڈ کا مظاہرہ کیا۔ حب الوطنی کے جذبے سے سرشار طلبہ کی شاندار پریڈ نے سامعین کے دلوں کو موہ لیا۔ اس پروگرام میں علاقہ بھر سے مختلف اسکولوں اور کالجوں کے طلبہ و طالبات نے شرکت کی۔ تقریب میں مختلف تعلیمی اداروں کے طلباء وطالبات کے ساتھ ساتھ جموں وکشمیر پولیس کے دستے نے بھی پریڈ میں حصہ لیا۔ تقریب میں فنکاروں اور طالب علموں نے ثقافتی اور ملی نغمے بھی پیش کیے۔ یوم جمہوریہ کی تقاریب سے قبل پورے یو ٹی جموں و کشمیر کے ساتھ ساتھ تھنہ منڈی میں بھی سخت حفاظتی انتظامات کے بیچ تحصیل انتظامیہ کی جانب سے فل ڈریس ریہرسل کا اہتمام کیا گیا۔ اس موقع پر تحصیلدار تھنہ منڈی سید مظہر علی شاہ، کلچرل افیسر سلیم نوشاد رینہ، این سی سی کوآرڈینیٹر پروفیسر الطاف حسین، پولیس سب انسپکٹر فیضل دین اور محکمہ پی ڈی ڈی کے جونئیر انجینئر وقار احمد ڈار کے علاوہ دیگر تمام محکموں کے ملازمین اور علاقہ بھر سے سول سوسائٹی کے ممبران، پنچوں سرپنچوں اور کونسلروں کے ساتھ ساتھ متعدد سیاسی اور سماجی شخصیات نے بھی حصہ لیا۔ جبکہ مختلف سکولوں سے آئے ہوئے طلبہ اور دیگر نوجوانوں کی بھی ایک بڑی تعداد پروگرام میں موجود تھی۔سرحدی ضلع پونچھ میں 26 جنوری کو 76ویں یوم جمہوریہ کی تقریبات کی تیاریاں اپنے آخری مرحلے میں پہنچ گئی ہیں۔یوم جمہوریہ کی تقریب کے پیش نظر جہاں پولیس نے پورے ضلع میں سخت حفاظتی اقدامات اٹھا رکھے ہیں۔وہی ضلع انتظامیہ کی جانب سے بھی تقریب احسن طریقے سے سر انجام دینے کے لیے تمام تر انتظامات مکمل کیے جا رہے ہیں اس دوران 24 جنوری جمعہ کو ’فْل ڈریس ریہرسل‘ کی عظیم تقریب سپورٹ سٹیڈیم پونچھ میں منعقد کی گئی۔ اس دوران اضافی ضلع ترقیاتی کمشنر پونچھ طاہر مصطفی ملک نے قومی پرچم لہرا کر اسے سلامی دی۔انہوں نے اس دوران خطاب کرتے ہوئے شرکا کو امن بھائی چارے کو برقرار رکھنے کے لئے اہم کردار ادا کرنے کی اپیل کی۔ انہوں نے ضلع انتظامیہ کی جانب سے ضلع میں کیے گئے تعمیر و ترقیاتی کاموں پر بھی سرسری روشنی ڈالی۔صدر موصوف کے خطاب کے بعد مارچ پاس کیا گیا۔مارچ پاس میں مختلف تعلیمی اداروں کے طلبہ و طالبات، این ایس ایس کریڈٹ،سی ار پی ایف،ایس او جی، ضلعی پولیس اور ہند فوج کے دستوں نے قدم سے قدم ملا کر بھائی چاریکا پیغام دیا۔ ریہرسل میں پریڈ کا باریک بینی سے معائنہ کیا گیا، جس میں حصہ لینے والے دستوں کی لگن اور نظم و ضبط کا مظاہرہ کیا گیا۔ اے ڈی سی کے ساتھ ایڈیشنل سپرنٹنڈنٹ آف پولیس (ایڈی ایس پی) موہن لال شرما بھی تھے۔ پریڈ کی کمانڈ ڈپٹی سپرنٹنڈنٹ آف پولیس (ڈی وائی ایس پی) سید عقیل شاہ نے کی، جس میں انسپکٹر مختیار احمد سیکنڈ ان کمانڈ کے طور پر خدمات انجام دے رہے تھے۔
