عاصف بٹ
ملواڑدن( کشتواڑ)// جموں و کشمیر کے وزیر اعلیٰ عمر عبداللہ نے جمعرات کو کشتواڑ کے ملواڑون مڑواہ گائوں کا دورہ کیا اور حالیہ تباہ کن آگ کے متاثرین سے ملاقات کی ۔ انکے ہمراہ نائب وزیر اعلیٰ سریندر چودھری اور مقامی ایم ایل اے اندوال پیارے لال شرما بھی تھے۔وہ دن کے1.30بجے یہاں پہنچے اور گائوں کی ہر سوختی مکان کا جائزہ لیا اور ہر گلی کوچے کا دورہ کیا۔بعد میں وہ مڈل سکول احاطے میں بیٹھے اور یہاںمتاثرین کیساتھ ساتھ ضلع انتظامیہ افسران سے ملاقات کی۔مقامی آبادی نے وزیر اعلیٰ کے سامنے علاقے کو درپیش مشکلات کے بارے مطالبات رکھے۔انہوں نے علاقے میںفائر سروس سٹیشن، نوجوانوں کی سپیشل بھرتی، مفت راشن وغیرہ، چنجر گونڈا ٹنل(کشتواڑ سے مڑوا تک ملانے والی)ژوئی درمن ٹنل (واڈون اورمتی گائورن کے درمیان) بنانے کا مطالبہ کیا۔وزیر اعلیٰ نے ابتدائی ریلیف کی فراہمی کے لیے حکومت اور انتظامیہ کی جانب سے کی جانے والی کوششوںکو سراہتے ہوئے کہاکہ امدادی رقم میں اضافے کیا جائیگا۔ انہوں نے کہا کہ ہر کنبے کوسی ایم ریلیف فنڈ سے2لاکھ روپے کی اضافی رقم دی جائیگی نیزپی ایم پیکیج کے تحت مزید امداد دینے کا مرکز سے مطالبہ کریں گے۔عمر نے انہیں یقین دلایا کہ ان کی حالت زار پر توجہ دی جائے گی۔
عمر نے کہا”یہ ہماری ذمہ داری ہے کہ ہم یہاں کے لوگوں تک پہنچیں اور انہیں یہ احساس دلائیں کہ وہ اس مشکل وقت میں تنہا نہیں ہیں، یہ ہماری ذمہ داری ہے کہ ہم ان کی مدد کریں تاکہ وہ ایک نئے انداز میں زندگی بسر کریں،” ۔عمر نے متاثرین کو وہ امداد حاصل کرنے کو یقینی بنانے کے اپنے عزم پر زور دیا جس کے وہ مستحق ہیں۔۔انہوں نے متاثرین کی اپنے گھروں کو دوبارہ تعمیر کرنے کی فوری ضرورت کو تسلیم کرتے ہوئے کہاکہ وزیر اعظم آواز سکیم کے تحت ان کی مدد کی جائے گی تاکہ وہ رقم حاصل کر سکیں اور اپنے ڈھانچے کو دوبارہ قائم کر سکیں،” ۔ باتھ روم جیسی بنیادی سہولیات کی کمی کے بارے میں، عبداللہ نے پہلے گھروں کو بحال کرنے کی اہمیت پر زور دیا۔ جب گھر بنیں گے تو غسل خانے بنیں گے، میرا فرض ہے کہ پہلے ان کے گھر بنوائوں، ہم غسل خانوں کا کیا کریں گے اگر ان کے سروں پر چھت نہیں ہے؟ ۔عمر عبداللہ نے اس بات کا اعادہ کیا کہ ان کی توجہ سیاسی فائدے کے بجائے متاثرین کو فوری امداد فراہم کرنے پر مرکوز ہے۔ جیسا کہ میں نے اپنی تقریر میں کہا، میں یہاں سیاست کرنے نہیں آیا ہوں، آج جو تباہی ہوئی ہے اس سے عوام کو نکالنا ہے، اور ہم ایسا کریں گے، “۔ عمر عبداللہ کا دورہ ایک ایسے وقت میں ہوا جب کشتواڑ کا مڑواہ خطہ آگ کے نتیجے میں جھلس رہا ہے، متاثرہ خاندان اپنی زندگیوں کی تعمیر نو کے لیے جدوجہد کر رہے ہیں۔
