عظمیٰ یاسمین
تھنہ منڈی// ہسپلوٹ تاا لال براستہ کریوٹ رابطہ سڑک پر بلیک ٹاپنگ نہ ہونے کی وجہ سے مسافروں، راہگیروں اور گاڑیوں کے لئے پریشانی کا باعث بنی ہوئی ہے لیکن کسی کے کان پر جوں تک نہیں رینگتی۔ اس سلسلے میں علاقہ کے مکینوں نے میڈیا کو بتایا کہ ہسپلوٹ تاا لال براستہ کریوٹ رابطہ سڑک پر بلیک ٹاپنگ اور دیگر حفاظتی اقدامات نہ ہونے کی وجہ سے لوگوں کو شدید پریشانیوں کا سامنا کرنا پڑ رہا ہے۔ کیونکہ اس سڑک کی حالت دن بہ دن بد سے بدتر ہوتی جارہی ہے۔ سڑک میں جگہ جگہ گہرے گڑھے پڑے ہوئے ہیں خصوصا چھوٹی گاڑیوں کے لئے یہ سڑک کسی بڑی مصیبت سے کم نہیں ہے لوگ بہت پریشان ہیں گاڑیوں کے مالکان بہت رنجیدہ اور دکھی ہیں ان کا کہنا ہے کہ ہم نے بنک قرضوں پر یہ گاڑیاں خرید رکھی ہیں لیکن سڑک کی تباہی کی وجہ سے ہماری گاڑیاں بھی برباد ہو گئی ہیں۔ انھوں نے مزید کہا کہ اکثر جگہوں سے یہ سڑک تباہ ہو چکی ہے جس پر چلنا بھی دشوار ہو چکا ہے۔ انھوں نے ضلع ترقیاتی کمشنر راجوری سے پرزور اپیل کرتے ہوئے کہا ہے کہ ترجیحی بنیادوں پر اس سڑک کو قابلِ آمد و رفت بنا کر اس پر بلیک ٹاپنگ کے کے ساتھ ساتھ دیگر حفاظتی اقدامات کو یقینی بنائے جانے کے احکامات جاری کئے جائیں تاکہ یہاں کی عوام کو اس مصیبت سے چھٹکارا مل سکے اور کسی بڑے اور جان لیوا حادثے سے بچ سکیں۔ انھوں نے امید ظاہر کی کہ ضلع ترقیاتی کمشنر راجوری لوگوں کی اس پریشانی کا ازالہ کر کے انھیں راحت پہنچانے میں اپنا بھرپور کردار ادا کریں گے۔
