محمد تسکین
بانہال // سویرا فائونڈیشن کے اشتراک سے گورنمنٹ ہائرسکینڈری سکول گاندھری رام بن میں ایک اْردو ادبی مشاعرے کا اہتمام کیا گیا جس میں گاندھری کی سرکردہ شخصیات ،ادب نوازوں اور مْحب اردو کے علاوہ بانہال ، بھدرواہ اور رام بن سے آئے ہوئے مہمانوں، ادیبوں اور قلم کاروں نے حصہ لیا اور اپنے کلام سے سامعین کو محظوظ کیا۔ اس ایک روزہ اردو ادبی مشاعرے کا آغاز تلاوت قرآن پاک سے کیا گیا اوربعد میں بچوں نے نعت بھی پیش کی۔ اس پروگرام میں بھدرواہ سے آئے قلمکاروں میں توصیف تابش، ساجد سرمدی، حسیب رضا اور آصف عطاء اللہ شامل تھے جبکہ بانہال سے ظاہر بانہالی، بہار احمد بہار، غلام رسول شاہین پوگلی ، غلام رسول مسرور پوگلی اور بشیر مہتاب تشریف فرما تھے۔ شعرا نے اپنے تازہ کلام سامعین کے سامنے پیش کئے اور داد وصول کی ۔ مشاعرے کی صدارت جموں و کشمیر کے معروف قلمکار اور پیر پنجال ادبی فورم بانہال کے صدر ظاہر بانہالی نے کی جبکہ شکیل الرحمان رونیال پرنسپل ہائیر سکینڈری سکول گاندھری ، غلام رسول شاہین اور سینئر صحافی رحمت اللہ رونیال مہمانان ذی وقار میں شامل تھے۔ اس پروگرام کی نظامت کے فرائض ساجد سرمدی نے انجام دیئے جبکہ سینئر صحافی رحمت اللہ رونیال نے اپنے استقبالیہ کلمات میں شرکاء اور شعراء کا تعارف کرایا۔ پروگرام کے آخر پر شکیل الرحمان رونیال پرنسپل ہائیرسکینڈری سکول گاندھری نے صدارتی خطبہ پیش کرتے ہوئے تمام شرکاء اور اس مشاعرے کے منتظمین محمد ہارون شاہ اور اعجازاحمد شاہ کا شکریہ ادا کرتے ہوئے اس پروگرام کی کامیابی کیلئے انہیں مبارکبادی پیش کی۔ محمد ہارون شاہ کے شکریہ کے الفاظ کے ساتھ یہ ادبی پروگرام اپنے اختتام کو پہنچا۔
ہائرسکینڈری گاندھری میں اردو ادبی مشاعرہ بانہال ، بھدرواہ اور رام بن سے ادیب اور قلمکار شریک ہوئے
