اشتیاق ملک
ڈوڈہ //ڈوڈہ ضلع کی سب ڈویژن گندوہ کے بھرتی گاؤں میں شائنگ چرٹیبل ٹرسٹ کے زیر اہتمام والی بال ٹورنامنٹ کا انعقاد کیا گیا جس میں جموں و کشمیر کے مختلف علاقوں سے آئی ٹیموں نے حصہ لیا۔ ٹورنامنٹ کا فائنل میچ سپورٹن کشمیر و صوفی کلب ڈھڈکائی کے درمیان کھیلا گیا جس میں سپورٹن کشمیر نے برتری حاصل کی۔ٹورنامنٹ کے اختتام پر ایک تقریب کا اہتمام کیا گیا جس میں ٹرسٹ کے چیئرمین و سابق سی ایم او ڈاکٹر محمد یعقوب میر، ایس ایچ او گندوہ پرویز کھانڈے و دیگر کئی شائقین نے شرکت کی۔اس موقع پر بولتے ہوئے انہوں نے کھلاڑیوں کو مبارکباد پیش کرتے ہوئے کہا کہ اس قسم کے ٹورنامنٹ منعقد کرنے کا مقصد جہاں نوجوانوں کو کھیل کود کی طرف راغب کرنا ہے وہیں والی بال کھلاڑیوں کو اپنا ہنر دکھانے کا موقع ملتا ہے۔ٹرسٹ کے چیئرمین نے نوجوانوں پر زور دیا کہ وہ اپنی پڑھائی کے ساتھ ساتھ کھیل کود کی طرف بھی دھیان دیں اور منشیات و دیگر برائیوں سے دور رہیں۔اس دوران دونوں ٹیموں کے کھلاڑیوں کو انعامات سے بھی نوازا گیا۔
