جموں//ڈی جی پی ڈاکٹرایس پی ویدنے کٹھوعہ معاملے کوسیاسی یامذہبی رنگ نہ دینے کی تلقین کرتے ہوئے واضح کیا ہے کہ ملزمان کیخلاف تحقیقات مکمل ہوتے ہی فردجرم عائدکی جائیگی۔ان کا کہنا تھا کہ ملزمان کیخلاف قانونی کارروائی میں کوئی بھی کوتاہی نہیں برتی جائیگی ۔ ڈائریکٹرجنرل پولیس کاکہناتھاکہ ضلع کٹھوعہ میں ایک کمسن بچی کی آبروریزی اورقتل کاواقعہ کوئی سیاسی،لسانی یامذہبی معاملہ نہیں ہے بلکہ ایک قانونی معاملہ ہے ،جسکی تحقیقات کیلئے کرائم برانچ کی ایک اعلیٰ سطحی ٹیم تشکیل دی گئی ہے ۔انہوںنے کہاکہ جموں وکشمیرپولیس ایک پیشہ وارانہ فورس ہے اورملک میں ریاستی پولیس کااپناایک مقام ہے ۔ڈی جی پی نے کہاکہ کٹھوعہ آبروریزی اورقتل واقعہ کی تحقیقات کومنطقی انجام تک پہنچایاجائیگا۔انہوں نے دوٹوک الفاظ میں کہاکہ ملزمان کوقانون کے کٹہرے میں لایاجائیگااور کوئی کوتاہی نہیں برتی جائیگی ۔ ڈی جی پی کاکہناتھاکہ اس معاملے کوبلاوجہ سیاسی یامذہبی رنگ دینے کی کوشش نہ کی جائے کیونکہ یہ ایک قانونی معاملہ ہے جسکوقانون کے تحت ہی حل کیاجائیگا۔انہوں نے کہاکہ ایڈیشنل ایس پی کرائم کشمیرکی سربراہی میں ایک ٹیم تشکیل دیکراس معاملے کی تحقیقات کرائم برانچ کوسونپی گئی ہے ۔انہوں نے کہاکہ تحقیقات تیزی کیساتھ آگے بڑھ رہی ہے اورتحقیقات مکمل ہوتے ہی ملزمان کیخلاف عدالت میں چالان پیش کرکے اُن پرفردجرم عائدکیاجائیگا۔انہوں نے کہاکہ کمسن بچی کی آبروریزی اورقتل کے معاملے کی تحقیقات میں کسی بھی طورکوئی سمجھوتہ نہیں کیاجائیگا۔
کمسن بچی کے قتل کی تحقیقات پر کوئی سمجھوتہ نہیں ہوگا
