عظمیٰ نیوز ڈیسک
لکھنو//سماج وادی پارٹی کے قومی صدر اور اتر پردیش کے سابق وزیر اعلیٰ اکھلیش یادو نے پیر کے روز برسراقتدار بی جے پی کی یوگی حکومت کو ہدف تنقید بناتے ہوئے کہا کہ سب سے کمزور لوگ ہی انکاونٹر کو اپنی طاقت تصور کرتے ہیں۔ انہوں نے مزید کہا کہ اتر پردیش کی بیدار عوام نے جس طرح لوک سبھا انتخاب میں بی جے پی کو شکست دی ہے، بی جے پی والے اسی کا بدلہ لے رہے ہیں۔قابل ذکر ہے کہ سلطان پور میں گزشتہ ماہ ہوئی ایک ڈکیتی کا ملزم اناو میں یوپی پولیس کے ساتھ ہوئے تصادم میں ہلاک ہو گیا۔ اس کے چند گھنٹوں بعد ہی سماج وادی پارٹی چیف نے سوشل میڈیا پلیٹ فارم ایکس پر کیے گئے اپنے ایک پوسٹ میں لکھا ہے کہ سب سے کمزور لوگ ہی انکاونٹر کو اپنی طاقت مانتے ہیں۔ کسی کا بھی فرضی انکاونٹر ناانصافی ہے۔ اکھلیش یادو کا کہنا ہے کہ تشدد اور خون سے اتر پردیش کی شبیہ کو مندمل کرنا اتر پردیش کے مستقبل کے خلاف ایک بڑی سازش ہے۔ ساتھ ہی وہ یہ بھی کہتے ہیں کہ آج کا برسراقتدار طبقہ جانتا ہے کہ وہ مستقبل میں پھر کبھی واپس نہیں چنے جائیں گے۔ اسی لیے وہ جاتے جاتے اتر پردیش میں ایسے حالات پیدا کر دینا چاہتے ہیں کہ ریاست میں کوئی داخل نہ ہو اور یہاں کاروبار نہ کرے۔
