عظمیٰ ویب ڈیسک
سرینگر /سرینگر میں لیجنڈس کرکٹ لیگ کی میزبانی کے ساتھ ہی کشمیر میں بین الاقوامی کرکٹ کی بحالی کا خواب پورا ہوا۔ سیکرٹری جموں کشمیر سپورٹس کونسل نظہت گل نے کہا کہ کشمیر میں بین الاقوامی کرکٹ کا ہونا بہت بڑی بات ہے۔ جو نوجوان ٹی وی پر کرکٹ دیکھ کر پلے بڑھے وہ اب اسٹیڈیم میں براہ راست میچ دیکھ سکتے ہیں۔سرینگر کے بخشی اسٹیڈیم میں لیجنڈس لیگ کرکٹ کی شروعات پر میڈیا سے بات کرتے ہوئے سیکرٹری اسپورٹس کونسل جموں کشمیر نظہت گل نے بین الاقوامی کرکٹ کی میزبانی کو ایک طویل انتظار کا خواب اور قومی فخر کا لمحہ قرار دیا۔انہوں نے کہا ’’ یہ واقعی متاثر کن ہے۔ نوجوان شائقین جو کل میچ دیکھنے آئے تھے وہ بین الاقوامی کھلاڑیوں کو قریب سے دیکھ کر بہت خوش ہوئے۔ میں نے کچھ بچوں سے بھی بات کی، اور ان کے لئے، یہ ایک خواب پورا ہونے کے مترادف تھا‘‘۔ انہوں نے کہا ’’ شائقین نے جوش و خروش سے اپنے پسندیدہ کھلاڑیوں اور ٹیموں کے لئے خوشی کا اظہار کیا‘‘۔
