عظمیٰ نیوز سروس
جموں//جموں و کشمیر نیشنل کانفرنس جموں کے صوبائی صدر رتن لال گپتا نے جمعرات کو کہا کہ بھارتیہ جنتا پارٹی کرگل ہل کونسل الیکشن ہارنے کے بعد مایوسی اور بے چینی کی حالت میں ہے۔این سی کے سینئر لیڈر نے کہا کہ کارگل میں بی جے پی کی شکست جموں و کشمیر میں پارٹی کے لئے ایک بڑا جھٹکا ہے اور اس بات کا بھی واضح اشارہ ہے کہ عوام نے ان کی تقسیم اور عوام دشمن پالیسیوں کو مسترد کر دیا ہے۔انہوں نے کہا کہ لداخ خود مختار پہاڑی ترقیاتی کونسل کا انتخاب آئین کے آرٹیکل 370 کی منسوخی کے بعد لداخ کو یونین ٹیریٹری کے طور پر تشکیل دینے کے بعد منعقد ہونے والا پہلاچنائو تھا اور لداخ کے لوگوں نے اس تقسیم کو سختی سے مسترد کر دیا ہے۔ گپتا نے ایل اے ایچ ڈی سی میں نیشنل کانفرنس کی جیت کو جموں و کشمیر میں مستقبل کے انتخابات کے لیے ٹرینڈ سیٹٹر قرار دیتے ہوئے مزید کہا کہ لوگوں نے سیکولر پارٹیوں کے حق میں ووٹ دیا ہے۔ انہوں نے زور دے کر کہا کہ بی جے پی جموں و کشمیر میں اسمبلی انتخابات لڑنے سے خوفزدہ ہے، اور اب بھی زعفرانی پارٹی جموں و کشمیر میں یو ایل بی اور پنچایتی انتخابات کا حوالہ دینے سے قاصر ہے، جس کی وجہ سے ان انتخابات کو روک دیا گیا ہے۔ یہ اس بات کا واضح اشارہ ہے کہ بی جے پی خطے میں اپنی جگہ کھو رہی ہے اور اب اسے انتخابات جیتنے کا یقین نہیں ہے۔اپنے وعدوں کو پورا کرنے میں ناکامی، اس کی تفرقہ انگیز بیان بازی اور عوام دشمن پالیسیوں کی وجہ سے پارٹی کی مقبولیت میں کمی آئی ہے۔ بی جے پی کو خطے میں سیکورٹی کی صورت حال کو غلط طریقے سے سنبھالنے پر بھی تنقید کا نشانہ بنایا گیا ہے۔ انہوں نے یہ بھی کہا کہ جموں و کشمیر کے نوجوان بھرتی گھوٹالے کا شکار ہوچکے ہیں اور بھرتیوں میں بڑے پیمانے پر بدعنوانی کی وجہ سے ان کا مستقبل تاریک ہے۔ صوبائی صدر نے مرکز میں حکومت کو ’’جملہ بازی سرکار‘‘ قرار دیا ہے۔ انہوں نے کہا کہ جموں خطہ میں کوئی بڑی ترقی نہیں ہوئی ہے کیونکہ صنعتی شعبہ بند ہونے کے دہانے پر ہے، بے روزگاری اپنے عروج پر ہے، لوگوں کو بنیادی سہولتوں کی کمی کا سامنا ہے، اور انہیں باقاعدہ بجلی اور پانی کی فراہمی بھی نہیں مل پا رہی ہے۔ حالانکہ حکومت جموں اور سری نگر کو اسمارٹ سٹی بنانے کی بات کر رہی ہے۔ سینئر این سی لیڈر نے کہا کہ زعفرانی پارٹی کا جھوٹا پروپیگنڈہ اہل وطن کے سامنے پوری طرح سے بے نقاب ہو چکا ہے اور عوام جموں و کشمیر میں آنے والے انتخابات میں بی جے پی کو ہر محاذ پر جموں خطہ کے لوگوں کو دھوکہ دینے کا منہ توڑ جواب دیں گے۔
