کرشی وگیان کیندرا سانبہ کی جانب سے کسان میلہ کا انعقاد

جموں//کرشی وگیان کیندرسانبہ نے کسان میلہ منعقد کیا جس میں سانبہ ضلع کے 500 سے زائد کسانوں نے شرکت کی۔ پروگرام کی مہمان خصوصی انورادھا گپتا، ڈپٹی کمشنرسانبہ نے زراعت کی اہمیت کے بارے میں تفصیل سے بات کی۔ انہوں نے کاشتکار برادری کی فلاح و بہبود کے لیے حکومت کی طرف سے کیے گئے مختلف اقدامات کا ذکر کیا اور کہا کہ حکومت ہندروایتی علم، جدید سائنس اور ٹکنالوجی کے ذریعے پیداوار میں اضافہ کرنے کی کوششیں کر رہا ہے، مارکیٹنگ کی بہتر سہولیات فراہم کر رہا ہے اور متعدد مسائل کو حل کر رہا ہے۔ ڈپٹی کمشنر نے مزید کہا کہ زرعی پالیسی، دیہی خوشحالی اور کسانوں کی آمدنی اور معیار زندگی میں بہتری لانے کے لیے نامیاتی کاشتکاری پر ایک نئے سرے سے زور دیا جا رہا ہے۔ انہوں نے زراعت کی پیداوار بڑھانے اور چھوٹے اور پسماندہ کسانوں کی آمدنی کو بہتر بنانے کے لیے نئی تکنیکوں کو اپنانے کی ضرورت پر بھی زور دیا۔ مزید، انہوں نے نوجوانوں کو آگے آنے اور ضلع میں زراعت کی ذمہ داری سنبھالنے کی تلقین کی۔ اس موقع پر خطاب کرتے ہوئے ڈاکٹر جیوتی کچرو، ڈائریکٹر پلاننگ اینڈ مانیٹرنگ، SKUAST-جموں اور کسان میلہ کے مہمان خصوصی نے کاشتکاروں کو مختلف اسٹارٹ اپس کے بارے میں آگاہ کیا۔ پردیپ کمار والی، ڈائریکٹر ریسرچ اور مہمان اعزازی نے KVK سامبا میں پیداواری صلاحیت اور کھیت کی فصلوں کی پیداوار بڑھانے میں معیاری بیج کے کردار اور پائیدار زراعت کی ترقی میں اس کے کردار پر روشنی ڈالی۔ انہوں نے SKUAST-جموں کے شراکتی بیج پروڈکشن پروگرام کی پہل پر بھی زور دیا۔ انہوں نے کسانوں کی آمدنی میں اضافہ کرنے والی باسمتی کی نئی جاری کردہ اقسام پر بھی روشنی ڈالی۔