کا کا پورہ پلوامہ میں مشتبہ ملی ٹینٹوں کا حملہ|آر پی ایف اہلکار ہلاک، افسر شدید زخمی

سید اعجاز
پلوامہ / / جنوبی ضلع پلوامہ کے کا کاپورہ ریلوے اسٹیشن کے بالکل قریب سوموار کی سہ پہر بعد مشتبہ ملی ٹینٹوں نے ریلوے پروٹکیشن فورس( سی آر پی ایف) اہلکاروں پر حملہ کیا جس کے نتیجے میں ایک حوالدارہلاک جبکہ سب انسپکٹرشدید طور پرزخمی ہو گیا ۔ حملے کے بعد پورے علاقے کو محاصرے میںلیا گیا اور حملہ آوروں کی تلاش شروع کر دی گئی ۔یہ واقعہ سہ پہر بعد قریب 6بجے اس وقت پیش آیا جب ریلوے سٹیشن کاکا پورہ احاطے کے باہرقریبی ٹی سٹال پر سب انسپکٹردیو راج اور ہیڈ کانسٹیبل سریندر سنگھ چائے پینے کیلئے دکان سے باہر بینچوں پر بیٹھے ہوئے تھے۔یہ دکان ریلوے سٹیشن احاطے کے بالکل قریب واقع ہے اور جہاں سے مسافر باہر آتے ہیں وہاں پر موجود ہے۔ دونوں اہلکار بغیر کسی ہتھیار کے عام کپڑوں میں ملوث تھے۔اس موقعہ پر ایک مسلح ملی ٹینٹ نمودار ہوا اور اس نے دونوں اہلکاروں کو بیک وقت نزدیک سے گولیاں چلائیں،اور فرار ہوا۔فائرنگ سے دونوں جوان خون میں لت پت ہوکر وہیں گر پڑے۔چنانچہ پولیس و سی آر پی ایف اہلکار فوری طور پر یہاں پہنچ گئے اور انہوں نے دونوں زخمی اہلکاروں کو نزدیکی اسپتال پہنچایا لیکن اسپتال پہنچنے سے قبل ہی ہیڈکانسٹیبل سریندر سنگھ زخموں کی تاب نہ لا کر دم توڑ بیٹھا تھا جبکہ سب انسپکٹر کوصدر اسپتال منتقل کیا گیا۔ پولیس نے بتایا کہ واقعہ کے فوراً بعد پورے علاقے کو گھیرے میں لیا گیا اور بڑے پیمانے پر تلاشی کارروائی شروع کی گئی۔واقع کی سی سی ٹی وی فوٹیج میں دیکھا جاسکتا ہے کہ دونوں اہلکار ٹی سٹال کے باہر لکڑی کے پینچوں پر بیٹھے ہوئے ہیں اور اچانک ایک نقاب پوش نوجوان نمودار ہوتا ہے  جو ان پر نزدیک سے گولیاں چلا کر فرار ہوتا ہے۔ فوٹیج میں مذکورہ نوجوان اپنے کسی ساتھی کی موٹر سائیکل پر فرار ہوجاتا ہے جو ٹی سٹال کی تھوڑی دوری پر حملہ آوار کا انتظار کررہا تھا۔

 

 

کپوارہ اور بانڈی پورہ میں  ایک ملی ٹینٹ اور ایک معاون گرفتار

اشرف چراغ +عازم جان

 

کپوارہ+بانڈی پورہ//پولیس نے دعویٰ کیا ہے کہ ویلگام رامحال کپوارہ اور بانڈی پورہ میں دو اگ الگ کارروائیوں کے دوران ایک ملی ٹینٹ اور انکے ایک معاون کو گرفتار کیا ۔پولیس کا کہنا ہے کہ فوج اور پولیس کی ایک مشترکہ ٹیم نے سنمولہ رامحال کپوارہ کراسنگ پر ایک ناکہ کے د وران ایک نوجوان کو مشکوک حالت میں دیکھا اور اس نے فرار ہونے کی کوشش کی تاہم پولیس کی ٹیم نے اسے گرفتار کیا۔ اسکی شناخت بشیر احمد کمار ولد عبد الرحیم کمار ساکن لیلم رامحال کے بطور ہوئی ۔پولیس کا کہنا ہے کہ دوران تلاشی اس کے قبضے سے ایک چینی ساخت پستول ،دو میگزین 13گولیاں اور ایک مو بائل فون بر آمد کیا گیا ۔پولیس کا کہنا ہے کہ ان کے خلاف ایک کیس درج کر کے تحقیقات شروع کر دی گئی ۔ادھرپولیس نے پیر کے روز شمالی کشمیر کے بانڈی پورہ ضلع کے لاوے پورہ علاقے میں مزاحمتی محاذ (TRF) تنظیم کے حال ہی میں بھرتی ہونے والے ایک جنگجو کو گرفتار کرنے کا دعویٰ کیا ۔پولیس ترجمان کے مطابق بانڈی پورہ پولیس، 14 آر آر اور 3 بٹالین سی آر پی ایف نے ایک خفیہ اطلاع پر محاصرے اور تلاشی کی کارروائی کے دوران ایک باغ سے، امیر طارق خان عرف ولید ولد طارق احمد خان کوگرفتار کیا ہے۔پولیس نے بتایا کہ مذکورہ نوجوان کی ٹی آر ایف تنظیم میں شمولیت کے حوالے سے تصویر 13 اپریل کو سوشل میڈیا پر وائرل ہوئی تھی۔اس سلسلے میں ایک کیس درج کر کے تفتیش شروع کر دی گئی ہے۔

 

طیارے میں بم کی افواہ، ہوائی اڈے پر پرواز روک دی گئی

سرینگر/اشفاق سعید/ایک GoAir طیارہ، جو دہلی جانے والا تھا، سرینگر میں اس وقت روک دیا گیا جب طیارے کے اندر بم کے بارے میں ایک ٹیلی فون کال موصول ہوئی۔حکام نے بتایاکہ طیارے کی مکمل تلاشی لی جا رہی ہے۔ انسپکٹر جنرل آف پولیس وجے کمار نے کہا کہ ابھی تک کچھ نہیں ملا ہے۔حکام نے بتایا کہ GoAir کی پرواز، جو دہلی واپس آنی تھی، سری نگر ہوائی اڈے پر اس وقت روک دی گئی جب ایک اور نجی ایئر لائن کے منیجر کو طیارے میں بم کے بارے میں کال موصول ہوئی۔ان کا کہنا تھا کہ کال دہلی میں ٹریس کی گئی اور اس کے بعد نمبر بند ہے۔پولیس معاملے کی تحقیقات کر رہی ہے۔ کمار نے مزید کہا کہ ہوائی اڈے کی کارروائیاں آسانی سے چل رہی ہیں۔