کانگریس نے یہاں بھاجپا کیلئے میدن کھلا چھوڑا

سرینگر//نیشنل کانفرنس نائب صدر عمر عبداللہ نے کانگریس کو تنقید کا نشانہ بناتے ہوئے کہا کہ انہوں نے لوک سبھا انتخابات کے دوران جموں و کشمیر میںبی جے پی کیلئے میدان کھلا چھوڑا۔عمر عبداللہ کا کہنا تھا کہ لوک سبھا انتخابات کے دوران بھاجپا کی لیڈر شپ نے ریاست کا دورہ کرتے ہوئے یہاں کئی اہم عوامی میٹنگوں اور جلسوں سے خطابات کئے تاہم کانگریس پارٹی اس حوالے سے بالکل ناکام رہی۔سماجی رابطہ سائٹ ٹویٹر پر عمر کا کہنا تھا کہ ’’  اسکے برعکس مودی جی اور امت شاہ نے کئی عوامی جلسے کئے،بھلے ہی وہ کشمیر نہ آئے لیکن انہوں نے ریاست کو نظر انداز نہیں کیا‘‘۔عمر نے بتایا کہ ’’کانگریس کے ریاست جموں وکشمیر کے تئیں ایسے اپروچ سے متعلق کئی سوالات کھڑے ہورہے ہیں، اس عرصے کے دوران کانگریس لیڈر شپ نے ایک بھی عوامی نشست منعقد نہیں کی گئی‘‘۔عمر نے بتایا کہ اگر چہ وزیراعظم نریندر مودی اور بھاجپا صدر امت شاہ نے بذات خود کشمیر کا کوئی دورہ نہیں کیا تاہم پارٹی نے کشمیر کو نظر انداز ہونے نہیں دیا۔انہوں نے کہا کہ آسان لفظوں میں بھاجپا کیلئے میدان کھلا چھوڑا گیا۔انہوں نے ٹویٹ میں کہا’’ کانگریس ریاست کی6نشستوں میں سے 4پر مقابلہ کرنے کی پوزیشن میں تھی،ان میں سے 3نشستوں پر براہ راست بھاجپا کیساتھ مقابلہ تھا،جہاں تک الیکشن مہم کا تعلق ہے تو یہ حیران کن امر ہے کہ بھاجپا کیلئے میدان کھلا چھوڑا گیا‘‘۔