برمنگھم/ہندوستانی خواتین کرکٹ ٹیم نے دولت مشترکہ کھیل 2022 میں بارباڈوس کو 100 رنز کے بڑے فرق سے شکست دے کر کے سیمی فائنل میں جگہ بنالی ہے ۔بدھ کو کھیلے گئے گروپ اے کے آخری میچ میں ہندوستان نے پہلے بلے بازی کرتے ہوئے مقررہ 20 اوورز میں 163 رنز بنائے تھے جس کے جواب میں بارباڈوس صرف 62 رنز ہی بنا سکی۔بارباڈوس نے ٹاس جیت کر ہندوستان کو پہلے بلے بازی کی دعوت دی اور اوپنر اسمرتی مندھانا (5) کو جلد ہی پویلین بھیج دیا، لیکن اس کے بعد کچھ بھی ان کے حق میں نہیں ہوا۔شفالی ورما نے 26 گیندوں میں سات چوکوں اور ایک چھکے کی مدد سے 43 رنز بنائے ۔ کپتان ہرمن پریت کور (0) اور وکٹ کیپر تانیہ بھاٹیہ (6) نمایاں شراکت نہ کر سکیں لیکن جمائما روڈریگز اور دیپتی شرما نے ناقابل شکست 70 رنز کی شراکت قائم کر کے ہندوستان کو 162/4 تک پہنچا دیا۔روڈریگز نے چھ چوکوں اور ایک چھکا کی مدد سے سب سے زیادہ 56 (46) رن بنائے جبکہ شرما نے 28 گیندوں پر دو چوکوں اور ایک چھکا کی مدد سے 34 رنوں کی اننگ کھیلی۔بارباڈوس 162 رنوں کے ہدف کا تعاقب کرتے ہوئے کبھی بھی مقابلے میں نہیں تھا۔ رینوکا سنگھ نے اپنی شاندار فارم کو جاری رکھتے ہوئے پاور پلے میں ہی مخالف ٹیم کے چار بلے بازوں کو پویلین لوٹا دیا۔ رینوکا نے اپنے چار اووروں میں 2.5 کی اوسط سے صرف 10 رن دے کر چار وکٹ لئے ۔بارباڈوس کی جانب سے کشونا نائٹ نے سب سے زیادہ 16 رن بنائے ، جبکہ شاکرہ سلمان نے 12 رنوں کی اننگ کھیلی۔ ان کے علاوہ ٹیم کا کوئی کھلاڑی 10 رنز کا ہندسہ بھی نہ چھو سکا۔ہندوستان کی جانب سے رینوکا کے علاوہ میگھنا سنگھ، اسنیہ رانا، رادھا یادو اور ہرمن پریت نے ایک ایک وکٹ لیا۔اب سیمی فائنل میں ہندوستان کا مقابلہ انگلینڈ یا نیوزی لینڈ سے ہوگا۔(یواین آئی)
کامن ویلتھ گیمز بارباڈوس کو شکست دے کرہندوستان سیمی فائنل میں
