ڈینگلہ جنیاڑ میں دو روزہ محبت رسولؐ کانفرنس کا آغا پہلے روز مدعو علماء نے سیرت مبارکہ کے مختلف گوشوں پر روشنی ڈالی

عظمیٰ نیوزسروس

پونچھ//جامعہ معین السنہ ڈینگلہ جنیاڑ پونچھ میں دو روزہ عظیم الشان محبت رسول صلی اللہ علیہ وسلم کانفرنس کا انعقاد کیا گیا ہے۔کانفرنس کے پہلے روز ملک کے ساتھ ساتھ جموں و کشمیر کے تمام اضلاع سے مدعو کیے گئے معروف علماء دین نے شرکت کی اور پیغمبر اسلام حضرت محمد صلی اللہ علیہ وسلم کی مبارک زندگی پر روشنی ڈالی اور عوام سے اتباع سنت اور سیرت النبیﷺ کے مطابق زندگی گزارنے کی تلقین کی۔محبت رسولؐ کانفرنس کے پہلے روز شعرائے کرام نے نعت و منقبت کے نذرانے پیش کیے وہیں جموں و کشمیر کے معروف عالم دین اور مقرر مولانا عبدالرشید داؤدی نے احادیث کی روشنی میں خاتم النببینﷺ کی ابتدائی زندگی پر روشنی ڈالی۔انہوں نے اپنے بیان میں عرب کے اُس دور اور آنحضرتﷺ کے مبارک اسوہ حسنہ کے ذریعے آفاقی پیغام کو دنیا بھر میں پھیلانے کے حوالہ سے روشنی ڈالی۔ انہوں نے کہا کہ ’’ایک مسلمان کو کبھی مایوس نہیں ہونا چاہئے، کیونکہ پیغمبر آخر الزمان ﷺ کا پیغام رہتی دنیا تک قائم رہے گا اور ہمیں بھی اُن کے مبارک طریقہ پر زندگی گزارنی چاہئے۔انہوں نے اپنے منفرد انداز میں قرآن پاک کی کئی آیات کی تفسیر کی روشنی میں حضرت محمد صلی اللہ علیہ وسلم کی عظمت پر روشنی ڈالی۔جامعہ معین السنہ ڈینگلہ جنیاڑ پونچھ کے چیئرمین مولانا بشارت ثقافی نے علماء و تشریف لانے والے مہمانوں، طلبہ اور منتظمین کا شکریہ ادا کیا۔انہوں نے آج یعنی محبت رسول کانفرنس کے دوسرے دن بھی تمام فرزندان توحید کو کانفرنس میں شریک ہو کر ثواب دارین حاصل کرنے کی اپیل کی۔