ڈیرن سیمی ویسٹ انڈیز ٹیم کے تمام فارمیٹس کا کوچ مقرر

پورٹ آف اسپین/یواین آئی/کرکٹ ویسٹ انڈیز (سی ڈبلیو آئی) کے ڈائریکٹر مائلز باسکومب نے ڈیرن سیمی کو ویسٹ انڈیز کرکٹ ٹیم کے تمام فارمیٹس کا کوچ مقرر کیا ہے ۔ وہ اپریل 2025 میں موجودہ ٹیسٹ کوچ آندرے کول کی جگہ لیں گے ۔ لمیٹڈ اوورز کے کوچ ڈیرن سیمی نے تمام فارمیٹس کے لیے کوچ مقرر ہونے پر کہا کہ کسی بھی فارمیٹ، کسی بھی پوزیشن میں ویسٹ انڈیز کی نمائندگی کرنا میرے لیے ہمیشہ اعزاز کی بات ہے ۔ حالانکہ میں نے اس خبر کا تصور بھی نہیں کیا تھا۔ میں نے کبھی سوچا بھی نہیں تھا کہ میں کوچ بنوں گا، لیکن اب تک جس طرح سے چیزیں بدلی ہیں، مجھے نوکری سے پیار ہو گیا ہے ۔ میں اپنے نئے کردار، نئے سفر کے لیے بھی پرجوش ہوں۔’’ مئی 2023 سے سیمی کی کوچنگ کے دوران ویسٹ انڈیز نے 28 میں سے 15 ون ڈے میچ جیتے ہیں۔ انہوں نے اس عرصے کے دوران سات میں سے چار دو طرفہ سیریز جیتی ہیں۔ ٹی۔ٹوئنٹی کی بات کریں تو ٹیم نے ہندوستان، انگلینڈ اور جنوبی افریقہ کے خلاف چار ہوم سیریز جیتی ہیں۔ مجموعی طور پر انہوں نے اس عرصے کے دوران 35 ٹی۔ٹوئنٹی میچوں میں سے 20 جیتے ہیں۔