ڈولو نے مبارک منڈی ہیری ٹیج کمپلیکس کا دورہ کیا | ہیری ٹیج کمپلیکس کے تحفظ کے کاموں کا موقع پر جائیزہ لیا

عظمیٰ نیوز سروس

جموں//چیف سیکرٹری مسٹر اتل ڈولو نے مبارک منڈی ہیریٹیج کمپلیکس کا دورہ کیا اور وہاں کئے جا رہے تمام بحالی اور تحفظ کے کاموں کا جائیزہ لیا ۔ اس موقع پر ان کے ہمراہ پرنسپل سیکرٹری ثقافت ، کمشنر سیکرٹری سیاحت ، سیکرٹری آر اینڈ بی ، ڈی جی بجٹ ، ایگزیکٹو ڈائریکٹر مبارک منڈی ہیریٹیج سوسائٹی ، سی ای او جے ایس سی ایل کے علاوہ دیگر متعلقہ افسران تھے ۔ چیف سیکرٹری نے کمپلیکس کی مختلف تاریخی عمارتوں کا دورہ کیا اور وہاں کئے گئے یا کئے جانے والے تحفظ کے کاموں کا نوٹس لیا ۔ انہوں نے سوسائٹی کے بعد کے منصوبوں کے بارے میں دریافت کیا ۔مسٹر ڈولو نے ہر تحفظ اور خوبصورتی کے کام کی تکمیل کیلئے طے شدہ ٹائم لائینز کے بارے میں بھی پوچھا ۔ انہوں نے ہر کام کو پوری تندہی کے ساتھ انجام دینے پر زور دیا کیونکہ ورثے کے تحفظ کا کام کافی تکنیکی نوعیت کا ہے ۔ انہوں نے کمپلیکس کی اصل شان کو بحال کرنے کے ساتھ ساتھ اس کے ماضی کی شان کے مطابق اس کی جمالیاتی کشش کو برقرار رکھنے کی ہدایت دی ۔ وہ تزئین و آرائش شدہ دربار ہال اور ڈوگرہ میوزیم کے علاوہ دوسرے ڈھانچے جیسے راجہ رام سنگھ اور راجہ امر سنگھ محلوں کے اندر گئے جہاں کام جاری ہے ۔ انہوں نے دیگر ورثے کے ڈھانچے جیسے پنک ہال ، گول گھر ، شیش محل ، مہارانی چاڑک محل ، گیلری محل اور دیگر اندرونی ڈھانچے کا بھی جائیزہ لیا ۔ انہوں نے ہر ڈھانچے کے فن تعمیر اور جگہ کو مدِ نظر رکھتے ہوئے ان کو موثر تحفظ اور دوبارہ استعمال کیلئے ایک مضبوط منصوبہ بنانے پر زور دیا ۔ دورے کے دوران ثقافت کے پرنسپل سیکرٹری نے مقامی فن اور ثقافت کے فروغ کیلئے کمپلیکس کی اہمیت پر روشنی ڈالی ۔ ایگزیکٹو ڈائریکٹر ایم ایم جے ایچ ایس نے اس کمپلیکس کے تحفظ کے اغراض و مقاصد کے بارے میں مجموعی تعارف پیش کیا ۔