ڈسپلن شکنی پر کھلاڑیوں پر پابندی لگ سکتی ہے :بی سی سی آئی

ممبئی/یو این آئی/ بورڈ آف کنٹرول فار کرکٹ ان انڈیا (بی سی سی آئی) نے 10 نکاتی قواعد جاری کرتے ہوئے ٹیم میں “نظم و ضبط، اتحاد اور مثبت ماحول” کو فروغ دینے کے لیے ایک بے مثال قدم اٹھایا ہے اور کہا ہے کہ جو کھلاڑی ان پر عمل نہیں کریں گے ان کے معاہدے منسوخ کرکے ان کے انڈین پریمیئر لیگ (آئی پی ایل) اور ڈومیسٹک کرکٹ کھیلنے پر روک لگا دی جائے گی۔ ‘پالیسی ڈوکیومنٹ فار ٹیم انڈیا’ کے عنوان سے قواعد کا سیٹ جمعرات کو کھلاڑیوں کو بھیجا گیا اور اس میں گزشتہ ہفتے منعقدہ جائزہ میٹنگ میں دیے گئے مشورے بھی شامل ہیں۔ قوانین میں کہا گیا ہے کہ کھلاڑی ٹور، میچز اور پریکٹس کے لیے الگ سے سفر نہیں کر سکیں گے ۔ اجلاس میں کہا گیا کہ بعض کھلاڑی میچ یا پریکٹس کے لیے ٹیم بس کے بجائے اپنی گاڑیوں میں سفر کرتے ہیں جس سے ٹیم کے نظم و ضبط کی خلاف ورزی ہوتی ہے ۔ اس کے علاوہ یہ بھی کہا گیا کہ کچھ کھلاڑی پریکٹس سیشنز میں گروپ کے ساتھ وقت نہیں گزار رہے جس کی وجہ سے ٹیم کا ماحول خراب ہوتا ہے ۔ بی سی سی آئی نے کہا ہے کہ اگر کسی کھلاڑی کو کسی خاص حالات میں میچ یا پریکٹس کے لیے الگ سے سفر کرنا ہو تو اسے ہیڈ کوچ یا چیف سلیکٹر سے پیشگی اجازت لینی ہوگی۔ مزید برآں، انہیں کسی بھی پریکٹس سیشن کی پوری مدت تک رہنا ہوگا، چاہے ان کی پریکٹس جلد ختم ہو جائے ۔ غیر ملکی دوروں پر بھی کھلاڑیوں کو مشورہ دیا گیا ہے کہ وہ اپنی فیملی کے ساتھ الگ سفر کرنے کے بجائے ٹیم کے ساتھ سفر کریں تاکہ ٹیم میں نظم و ضبط اور تنظیم تقویت ملے ۔