عظمیٰ نیوز سروس
نئی دہلی//چین گزشتہ مالی سال (2023-24) میں118.4 بلین ڈالر کی باہمی تجارت کے ساتھ ہندوستان کا سب سے بڑا تجارتی شراکت دار رہا ہے۔ چین نے ہندوستان کے ساتھ تجارت کے معاملے میں امریکہ کو پیچھے چھوڑ دیا ہے۔یہ معلومات اکنامک ریسرچ انسٹی ٹیوٹ گلوبل ٹریڈ ریسرچ انیشیٹو (جی ٹی آر آئی) کے ڈیٹا سے حاصل ہوئی ہے۔ ہندوستان اور امریکہ کے درمیان دو طرفہ تجارت 2023-24میں 118.3بلین ڈالر ہونے کی امید ہے۔ امریکہ 2021-22 اور 2022-23میںہندوستان کا سب سے بڑا تجارتی پارٹنر تھا۔ اعداد و شمار سے پتہ چلتا ہے کہ گزشتہ مالی سال میں چین کو ہندوستان کی برآمدات8.7 فیصد بڑھ کر16.67 بلین ڈالر تک پہنچ گئیں۔ لوہے، سوتی دھاگے، ٹیکسٹائل، ہینڈلوم، مسالے، پھل اور سبزیاں، پلاسٹک اور لینولیم جیسے شعبوں میں ہندوستان کی برآمدات میں اضافہ ہوا ہے۔ گزشتہ مالی سال میں پڑوسی ممالک سے ہندوستان کی درآمدات3.24 فیصد بڑھ کر 101.7 بلین ڈالر تک پہنچ گئیں۔ دوسری طرف 2023-24میں امریکہ کو برآمدات 1.23 فیصد کم ہو کر77.5 بلین ڈالر رہ گئیں۔2022-23 میں یہ78.54 بلین ڈالر تھا۔ امریکہ سے ہندوستان کی درآمدات تقریباً20 فیصد کم ہو کر40.8 بلین ڈالر رہ گئیں۔
