لاہور//2025 کی چیمپئنز ٹرافی کو پاکستان سے ویسٹ انڈیز اور امریکا منتقل کیے جانے کا امکان ہے۔اطلاعات کے مطابق 2024 کا T20 ورلڈ کپ جو کہ ویسٹ انڈیز اور امریکا میں ہونے کا منصوبہ ہے اور 50 اوور کی 2025 چیمپئنز ٹرافی پاکستان میں ہونی ہے اب ان دونوں ایونٹ کے وینیوز میں تبدیلی ہو سکتی ہے۔ٹی ٹوئنٹی ورلڈ کپ کے بجائے ویسٹ انڈیز اور امریکا ممکنہ طور پر چیمپئنز ٹرافی کی میزبانی کر سکتے ہیں جبکہ پاکستان کرکٹ بورڈ (پی سی بی) کو اس تبدیلی کے لیے مالی معاوضہ مل سکتا ہے۔
کرکٹ ویب سائٹ نے نیوز 18 کا حوالہ دیتے ہوئے کہا ہے کہ انٹرنیشنل کرکٹ کونسل (آئی سی سی) 2025 کا ٹورنامنٹ پاکستان سے کیریبین میں منتقل کرنے پر غور کر رہی ہے جب کہ 2024 کا ٹی ٹوئنٹی ورلڈ کپ اسکاٹ لینڈ اور آئرلینڈ میں منتقل کیا جائے گا۔تاہم یہ بات چیت اپنے ابتدائی مراحل میں ہے اور صرف زبانی طور پر کی گئی ہے۔ آئی سی سی کے اگلے میڈیا حقوق کے لیے براڈکاسٹر بھی اس تجویز سے متفق ہیں، اور اگر معاملات آسانی سے آگے بڑھتے ہیں تو تبدیلیاں لاگو ہو سکتی ہیں۔چیمپیئنز ٹرافی کو ویسٹ انڈیز اور یو ایس اے منتقل کرنے سے ریاستہائے متحدہ کو ٹورنامنٹ کی میزبانی کے لیے ضروری انفراسٹرکچر تیار کرنے کے لیے ایک اضافی سال کا موقع ملے گا۔مزید برآں، چونکہ چیمپئنز ٹرافی میں T20 ورلڈ کپ کے مقابلے کم میچز ہوتے ہیں اس لیے اسے ویسٹ انڈیز اور USA کے لیے لاجسٹک طور پر زیادہ قابل عمل آپشن کے طور پر دیکھا جا رہا ہے۔
