عظمیٰ نیوز سروس
جموں// چیف سیکرٹری اتل ڈولو کی سربراہی میں ریاستی ایگزیکٹو کمیٹی (ایس ای سی) نے سٹیٹ ڈیزاسٹر ریسپانس فنڈ (ایس ڈی آر ایف) کی میٹنگ میں پہلے سے مطلع شدہ آفات کی فہرست میں مزید 5 مقامی آفات کو شامل کرنے کی منظوری دی۔ میٹنگ میں پرنسپل سیکرٹری ہوم اور ڈی ایم آر آر اینڈ آر کے علاوہ دیگر اراکین جیسے پرنسپل سیکرٹری فائنانس، اے ڈی جی پی لاء اینڈ آرڈر، کشمیر اور جموں کے صوبائی کمشنر، اور سیکرٹری ریونیو نے شرکت کی۔ ڈپٹی کمشنرز نے اپنے دفاتر سے ویڈیو کانفرنسنگ کے ذریعے میٹنگ میں حصہ لیا۔ ایس ای سی کے اراکین نے درج ذیل 5 مقامی آفات کو ایس ڈی آر ایف کے تحت مطلع شدہ فہرست میں شامل کرنے پر اتفاق کیا، جن میں گلیشیر جھیل کے پھٹنے کی صورت میں آنے والے سیلاب (GLOF)، بجلی گرنے اور آندھی طوفان، شدید برفباری، انسان اور جنگلی جانور کے تصادم کے واقعات اور کشتی الٹنے کے حادثات شامل ہیں۔ ان آفات کو یونین ٹیریٹری کی مخصوص آفات کے طور پر مطلع کیا گیا تاکہ متاثرہ افراد کو ایس ڈی آر ایف کے رہنما اصولوں کے مطابق فوائد فراہم کیے جا سکیں۔ یہ اقدام ان افراد کے لیے بہت ضروری ریلیف فراہم کرے گا جو ان آفات کا شکار ہوتے ہیں۔ میٹنگ میں بارہمولہ، گاندربل، کپواڑہ، سرینگر، راجوری، اور رام بن کے ڈپٹی کمشنرز کے لیے ان کے اضلاع میں سال کے دوران پیش آنے والی مختلف آفات کے اخراجات پورے کرنے کے لیے 6 کروڑ روپے جاری کرنے کی منظوری بھی دی گئی۔ اس کے علاوہ، ایچ جی/سی ڈی/ایس ڈی آر ایف کے لیے 6.5 کروڑ روپے مختلف آلات کی فراہمی جیسے ڈرونز، ریموٹ کنٹرولڈ لائف بوائے، فائر انٹری سوٹس، پاور ڈیسینڈرز، اور بیٹری سے چلنے والے کٹر کم اسپریڈرز فراہم کرنے کے لیے جاری کرنے کا فیصلہ کیا گیا۔ ایس ای سی نے تربیتی پروگرامز، مشقیں اور دیگر تیاری کی سرگرمیاں منعقد کر کے ایس ڈی آر ایف کی استعداد کار میں اضافے کے لیے 50 لاکھ روپے فراہم کرنے اور ایمرجنسی آپریشن سینٹر (EOC) کی اپ گریڈیشن کے لیے 30 لاکھ روپے کی منظوری دی۔ چیف سیکرٹری نے ڈپٹی کمشنرز سے ان کے اضلاع میں آفات کی تیاری کے بارے میں استفسار کیا اور ان کی طرف سے پیش کردہ تجاویز کا جائزہ لیا۔ ڈی ایم آر آر اینڈ آر کے پرنسپل سیکرٹری چندرکر بھارتی نے سال بھر میں محکمہ کی سرگرمیوں کی تفصیلات پیش کیں اور ایجنڈا آئٹمز کی اہمیت پر روشنی ڈالی تاکہ ریاست قدرتی آفات سے بہتر طور پر نمٹنے کے لیے تیار ہو۔
