پی ڈی پی ڈوڈہ کے عہدیداران اور کا رکنان کی میٹنگ منعقد

ڈوڈہ// پی ڈی پی ڈوڈہ کے عہدیداران اور کا رکنان کی ایک میٹنگ پارٹی کے ضلع صدر شہاب الحق بٹ کی صدارت میں منعقد ہوئی جس میں زونل،بلاک اور حلقہ سطح کے تمام عہدیداران اور سینئر کارکنان نے شرکت کی۔میٹنگ کے دوران چناب خطہ خصوصاً ڈوڈہ حلقہ کے مسائل اور حالات و واقعات پر آپسی تبادلۂ خیالات عمل میں لایا گیا اور تنظیمی امورات اور سرگرمیوں کا جائزہ لیاگیا۔یہاں جاری ایک پریس ریلیز میں کہا گیا ہے کہ اس موقع پر شہاب الحق بٹ نے پارٹی عہدیداران اور کارکنان کو ہدایت کی کہ وہ بنیادی سطح پر پارٹی کی مضبوطی اوررکنیت میں اضافہ کے لئے دن رات محنت کریں،عوام کے ساتھ رابطہ رکھیں، اُن کے دکھ درد میں شریک رہیں اور اُن کے مسائل و مشکلات کے ازالہ کے لئے ہر وہ کوشش کریں جو اُن کے بس میں ہو۔اسی طرح عوامی اعتماد حاصل کیا جا سکتا ہے اور جس پارٹی کو عوامی اعتماد حاصل ہو جائے وہی ایک مضبوط پارٹی کہلاتی ہے۔ اُنہوں نے کہا کہ پی ڈی پی عہدیداران اور کارکنان کو چاہیے کہ وہ اپنے ذاتی مفاد پر عوامی مفادات کو ترجیح دے کراُن توقعات پر پورا اترنے کی کوشش کریں جو عوام نے پارٹی کے ساتھ وابستہ کر رکھی ہیں۔ اُنہوں نے کہا کہ وہی پارٹی عوام میں مقبولیت کی بلندیاں حاصل کر سکتی ہے جس کے عہدیداران اور کارکنان عوا م کے ساتھ جڑے ہوئے ہوں،بلا امتیاز ہر ایک کی بے لوث خدمت کا جذبہ رکھتے ہوں، اپنے مفادات پر دوسروں کو ترجیح دینے والے اور دوسروں کے لئے قربانی دینے والے ہوں۔اُنہوں نے کہا کہ عوام الناس کے مسائل کے ازالہ کی کوشش کرنا ہماری ترجیحات میں شامل ہونا چاہیے اورہم میں سے ہر ایک کی یہ کوشش ہونی چاہیے کہ وہ اپنے علاقہ کی تعمیر و ترقی میں اہم کردار ادا کرے۔ اس قسم کے طرزِ عمل سے ہم عوام کا اعتماد حاصل کر کے پارٹی کو مضبوط بنا سکتے ہیں۔اُنہوں نے پارٹی عہدیداران اور کارکنان پر زور دیا کہ وہ موجودہ ریاستی حکومت اور پارٹی کی حصولیابیوں اور تعمیری و ترقیاتی منصوبوں سے عوام کو آگاہ کرکے پارٹی کے متعلق منفی پروپیگنڈہ پھیلانے کی کوشش کرنے والوں کی کوششوں کو ناکام بنائیں۔اُنہوں نے کہا کہ پی ڈی پی قیادت والی ریاستی مخلوط حکومت کو اگرچہ ابھی تک یکسوئی کے ساتھ کام کرنے کے مواقع بہت کم ملے ہیں،مگر اس کے با وجود اُس نے ابھی تک بہت کچھ کیا ہے اور زمینی سطح پراُس تبدیلی کا آغاز ہو چکا ہے جس کے لئے لوگوں نے اُسے مینڈیٹ دیا تھا۔ اُنہوں نے کہا کہ موجودہ ریاستی حکومت نے ریاست کے ہر خطہ اور علاقہ کی تعمیر و ترقی کا ایسا سلسلہ شروع کیا ہے جس سے ریاست ترقی کی نئی منازل طے کرے گی اور مرحوم مفتی محمد سعید کا لوگوں کا تقدیر بدلنے کا جو خواب تھا  محترمہ محبوبہ مفتی کی قیادت میںوہ پورا ہو جائے گا۔اُنہوں نے کہا کہ پی ڈی پی ریاست میں امن کی خواہاں ہے کیوں کہ امن و امان کے بغیر تعمیر و ترقی ممکن نہیں ۔اُنہوں نے کہا کہ نا مساعد حالات کی وجہ سے ریاست میںترقی کی رفتار میں سستی آئی ہے اور محترمہ محبوبہ مفتی کی قیادت میں حکومت اور پارٹی حالات کو صحیح ڈگر پر لانے کی کوشش میں مصروف ہے تاکہ حکومت یکسوئی کے ساتھ ترقیاتی اور تعمیراتی کاموں پر توجہ مرکوز کر سکے۔ اُنہوںنے عوام سے اپیل کی کہ وہ متحد رہیں اورفرقہ پرست اور امن دشمن عناصرسے خبردار رہیں۔اُنہوں نے کہا کہ کچھ سیاسی پارٹیاں اپنے حقیر مفادات کے لئے حالات کو مزید خراب کی کوشش کر رہی ہیں اور اپنی سیاسی روٹیاں سینکنے کے لئے عوام کو تقسیم کرنا چاہتی ہیں،مگر پی ڈی پی ان کے ناپاک اور مذموم عزائم کو کامیاب نہیں ہونے دے گی۔اس موقع پر زونل صدر ڈوڈہ ر یاض حسین منٹو ، زونل جنرل سکریٹری غلام محمد نیائک ،زونل سکریٹری حسام دین ، ڈسٹرکٹ آرگنائزنگ سکریٹری فاروق احمد زرگر، یوتھ جرنل سکریٹری سجاد حسین کھوکھر، یوتھ زونل صدر راشد حسین زرگر ،عبدل غنی رشو، عبدالرشید گنائی،مختیار احمد نٹنوں، غلام حیدر بٹ اور فاروق احمد میر نے بھی اپنے اپنے خیالات کا اظہار کیا۔پریس ریلیز میں دعویٰ کیا گیا ہے کہ اس موقع پر مختلف پارٹیوں سے تعلق رکھنے والے سیاسی کارکنان نے پی ڈی پی میں شمولیت اختیار کی اور اس عزم کا اظہار کیا کہ وہ پی ڈی پی کی مضبوطی دن رات محنت کریں گے۔