عظمیٰ نیوز سروس
جموں//ضلع مجسٹریٹ سچن کمار ویشیا نے ضلع میں پردھان منتری گرام سڑک یوجنا (پی ایم جی ایس وائی) سڑک پروجیکٹوں کی پیشرفت کا جائزہ لینے کے لیے ایک میٹنگ طلب کی۔میٹنگ کے دوران، ضلع مجسٹریٹ نے پہلے سے طے شدہ نظام الاوقات پر عمل کرنے کی ضرورت پر زور دیتے ہوئے، سڑکوں کی تعمیر کے لیے پروجیکٹ کے لیے مخصوص ڈیڈ لائن مقرر کی۔انہوں نے ان سڑکوں کے منصوبوں کی جامع نگرانی کی ذمہ داری سب ڈویڑنل مجسٹریٹس کو سونپی۔
ایس ڈی ایمز کو تمام قابل اطلاق قواعد و ضوابط کی پاسداری کرتے ہوئے پرعزم انداز اپنانے اور پراجیکٹ کو حتمی شکل دینے کی ہدایت دی گئی۔ڈی ایم نے ان قواعد و ضوابط کی حدود میں پیدا ہونے والی رکاوٹوں پر قابو پانے کی ضرورت پر زور دیا۔ انہوں نے جائز خدشات کے فوری حل اور اس بات کو یقینی بنانے پر زور دیا کہ ان کوششوں کے دوران عام لوگوں کو غیر ضروری مشکلات کا سامنا نہ کرنا پڑے۔ڈسٹرکٹ مجسٹریٹ نے اس بات پر زور دیا کہ غیر متوقع اور قدرتی چیلنجوں کو چھوڑ کر سڑکوں کو مقررہ مدت میں مکمل کیا جانا چاہیے۔
انہوں نے تمام اسٹیک ہولڈرز کو فعال طور پر شامل کرتے ہوئے گورننس کی فراہمی میں انتظامیہ کے ناگزیر کردار پر زور دیا۔اجلاس میں ڈی ایف او کے ساتھ جنگلات کی منظوری کے حوالے سے بھی تبادلہ خیال کیا گیا۔ اجلاس میں تکنیکی مسائل کا وسیع پیمانے پر جائزہ لیا گیا جو بعض منصوبوں کو بروقت حتمی شکل دینے میں رکاوٹ ہیں۔ ڈی ایف او پر زور دیا گیا کہ وہ پی ایم جی ایس وائی افسران کے ساتھ قریبی تعاون کریں تاکہ پروجیکٹوں کی بروقت تکمیل کو ممکن بنایا جاسکے۔
