عظمیٰ نیوز ڈیسک
نئی دہلی//پارلیمنٹ میں ایک بار پھر پیپر لیک کا معاملہ اٹھا۔ کانگریس کے رکن پارلیمنٹ اور لوک سبھا میں اپوزیشن لیڈر راہل گاندھی نے کہا کہ ملک دیکھ رہا ہے کہ امتحانی نظام میں بہت سی خامیاں ہیں۔ امتحانی نظام میں دھاندلی کی گئی ہے۔ وزیر تعلیم دھرمیندر پردھان نے سب کی خامیاں شمار کرا دیں لیکن اپنی نہیں بتائیں۔ راہل گاندھی نے کہا کہ وزیر تعلیم سے میرا سوال ہے کہ آپ اس مسئلے کو حل کرنے کیلئے کیا کر رہے ہیں؟لوک سبھا میں اپوزیشن لیڈر راہل گاندھی نے کہا کہ پیپر لیک ہونے کی بات صرف نیٹ کے تعلق سے نہیں کی جا رہی ہے بلکہ یہ تمام امتحانات کے بارے میں ہے۔ یہ ایک سنجیدہ موضوع ہے۔ وزیر تعلیم سب کو خاطی مان رہے ہیں مگر خود کو نہیں۔ انہوں نے اس مسئلے کو حل کرنے کے لیے کیا کیا؟ راہل گاندھی کے اس بیان پر وزیر تعلیم غصے میں آگئے اور کہا کہ کانگریس کے رکن پارلیمنٹ نے پورے امتحانی نظام کو بیکار قرار دیا ہے جو افسوسناک ہے۔پارلیمنٹ میں نیٹ پیپر لیک پر ہوئی بحث کے دوران سماجوادی پارٹی کے سربراہ اور قنوج کے رکن پارلیمنٹ اکھلیش یادو نے کہا کہ یہ حکومت پیپر لیک کا ریکارڈ بنانے جا رہی ہے۔
متنازعہ سوال کے جواب پر آئی آئی ٹی دہلی کی رائے طلب
نئی دہلی/یو این آئی/سپریم کورٹ نے انڈر گریجویٹ سطح کے میڈیکل اور دیگر کورسز میں داخلے سے متعلق 5 مئی کو منعقدہ قومی اہلیت کم داخلہ ٹیسٹ (نیٹ۔یو جی) 2024 کے ایک متنازعہ سوال کا جواب جاننے کے لئے دہلی کے انڈین انسٹی ٹیوٹ آف ٹیکنالوجی (آئی آئی ٹی) کے ڈائریکٹر کو متعلقہ موضوع کے ماہرین کی تین رکنی کمیٹی تشکیل دینے کا حکم دیا۔چیف جسٹس ڈی وائی چندرچوڑ اور جسٹس جے بی پارڈی والا اور منوج مشرا کی بنچ نے آئی آئی ٹی ڈائریکٹر کو ہدایت دی کہ وہ ماہرین کی ایک کمیٹی تشکیل دیں جو متنازعہ سوال کا صحیح متبادل تلاش کرے اور منگل 23 جولائی کی دوپہر 12 بجے تک عدالت کے سامنے اپنی رائے پیش کرنے کا حکم پاس دیا۔بنچ نے نیٹ امتحان کے دوبارہ انعقاد کے حق میں اور اس کے خلاف گھنٹوں تک مختلف عرضی گزاروں کے کئی وکلاء کی دلیلیں سننے کے بعد یہ حکم جاری کیا۔سماعت کے دوران بنچ نے نیٹ یو جی کے 5 مئی کو منعقدہ متنازعہ نیٹ یو جی امتحان کے سیٹ-ایس 3 کے فزکس حصے کے سوال نمبر 19 کے چار آپشنز میں سے دو کو درست جواب اعلان کرنے والی نیشنل ٹیسٹنگ ایجنسی (این ٹی اے) کے فیصلے پر کچھ عرضی گزاروں کی طرف سے اٹھائے گئے سوالات پر متعلقہ فریقوں کے دلائل سننے کے بعد یہ حکم دیا ۔بنچ کی صدارت کر رہے جسٹس چندر چوڑ نے سپریم کورٹ کے رجسٹرار جنرل سے کہا کہ وہ فوری طور پر آئی آئی ٹی دہلی کے ڈائریکٹر کو عدالت کے اس حکم کے بارے میں مطلع کریں، تاکہ اس حکم کو تیزی سے نافذ کیا جا سکے۔سپریم کورٹ منگل کو بھی لاکھوں طلباء کے مستقبل سے متعلق اس معاملے کی سماعت جاری رکھے گی۔
اہم مسئلہ،بامعنی بحث ہونی چاہیے: برلا
یو این آئی
نئی دہلی// لوک سبھا کے اسپیکر اوم برلا نے پیر کو کہا کہ قومی اہلیت کم داخلہ ٹیسٹ (این ای ای ٹی یو جی) پیپر لیک کا معاملہ بہت اہم ہے اور اس پر بامعنی بحث ہونی چاہئے برلا نے کہا کہ ملک کی مختلف ریاستوں میں کئی بار امتحانات کے سوالیہ پرچے لیک ہوئے ہیں اس پر سنجیدگی سے غور کرنے کی ضرورت ہے تاکہ اس بات کو یقینی بنایا جا سکے کہ مستقبل میں ایسے واقعات دوبارہ نہ ہوں۔ حکومت اس معاملے میں موصول ہونے والی بہترین تجاویز پر غور کرے گی۔انہوں نے کہا کہ ملک کے تمام امتحانات اور تعلیمی نظام پر سوال اٹھانا مناسب نہیں ہے، اس سے دنیا بھر میں ہندوستان کی شبیہ پر اثر پڑے گا۔ الزامات اور جوابی الزامات سے مسئلہ حل نہیں ہوگا۔ ایسی تجاویز آئیں جو پورے ایوان کے لیے قابل قبول ہوں۔
