پیغمبر حضرت محمد ؐ ہم سب کیلئے مشعلِ راہ

نئی دہلی // وزیر اعظم نریندر مودی نے غریبوں اور ضرورت مندوں کی خدمت کرنے کے پیغمبرحضرت محمدؐ اور امن و ہمدردی سے بھرے دنیا کی تعمیر کے لئے مہاتما بدھ کے پیغامات پر عمل کرنے کی ہم وطنوں سے اپیل کی۔ مودی نے ریڈیو سے نشر ہونے والے ’من کی بات‘پروگرام میں کہا’’میں تمام ہم وطنوں کو رمضان المبارک کے مقدس مہینے کی مبارکباد دیتا ہوں اور مجھے امید ہے کہ یہ موقع لوگوں کو امن اور خیر سگالی کے ان (پیغمبر محمدؐ کے ) پیغامات پر چلنے کی ترغیب دے گا‘‘۔انہوں نے کہا کہ رمضان پیغمبر محمدؐ کی تعلیم اور ان پیغامات کو یاد کرنے کا موقع ہے اور ان کی زندگی سے سبق لے کر مساوات اور بھائی چارے کے راستے پر چلنا ہم سب کی ذمہ داری بنتی ہے ۔انہوں نے کہا ’’ پیغمبر محمد ؐ نے لوگوں کو مساوات اور بھائی چارے کی راہ دکھائی جو ہم سب کیلئے مشعل راہ ہونی چاہیے‘‘۔مودی نے کہا پیغمبرؐ  نے کہا’’ایک بار ایک انسان نے پیغمبرؐ سے پوچھا اسلام میں کون سا کام سب سے بہتر ہے ؟پیغمبر محمدؐ نے جواب دیا’’کسی غریب اور ضرورت مند کو کھانا کھلانا اور سبھی سے محبت و شفقت سے ملنا، چاہے آپ انہیں جانتے ہوں یا نہ جانتے ہوں‘‘۔مودی نے کہا کہ پیغمبر ؐ  علم اور ہمدردی میں یقین رکھتے تھے ۔ انہیں کسی بات کا غرور نہیں تھا، وہ ﷺکہتے تھے کہ انا ہی علم کو شکست دیتی رہتی ہے ۔انہوں نے مزید کہا’’پیغمبر محمد ؐ کا خیال تھا کہ اگر آپ کے پاس کوئی بھی چیز آپ کی ضرورت سے زیادہ ہے تو آپ اسے کسی ضرورت مند شخص کو دے دیں، لہٰذا رمضان میں عطیات کی بھی بہت اہمیت ہے ‘‘۔ہم ان کی تعلیم پر مبنی ایک پرامن اور ہمدردی و رحمدلی سے بھرے  عالم کی تعمیر میں اپنی ذمہ داری ادا کر سکتے ہیں بشرطیکہ  انﷺ سے رہنمائی حاصل کر کے انکی ﷺ تعلیمات پر عمل پیرا ہونے کی کوشش کی جائے۔وزیر اعظم نے کہا کہ مساوات، امن، ہم آہنگی اور بھائی چارے طاقت کا سرچشمہ ہوتے ہیں،یہ ایسے انسانی اقدار ہیں، جن کی ضرورت آج کی دنیا کیلئے سب سے زیادہ ہے ۔اس موقعہ پر انہوں نے بودھ مت اور رائو امبید کر کو بھی یاد کیا۔