پیروں سے آٹا گوندھنے کا معاملہ | حکام نے یونٹ کا دورہ کیا، مواد کو ضائع کرنے کا حکم

غلام محمد
سوپور// محکمہ خوراک، میونسپل کونسل سوپور کے فوڈ انسپکٹر اور محکمہ محصولات کی ایک مشترکہ ٹیم نے شمالی قصبہ سوپور میں روٹی بنانے والے یونٹ کا دورہ کیا اور مواد کو ضائع کرنے کا حکم دیا، جہاں ایک غیر مقامی ملازم کو مبینہ طور پر مقامی لوگوں نے پاؤں سے آٹا گوندھتے ہوئے دیکھا۔اطلاعات کے مطابق مقامی انتظامیہ کی ایک ٹیم جس کی سربراہی تحصیلدار سوپور، فوڈ انسپکٹر، ایم سی سوپور کی ٹیم نے یونٹ کا دورہ کیا اور مواد کو پکڑنے کا حکم دیا۔فوڈ انسپکٹر امتیاز احمد نے میڈیا سے گفتگو کرتے ہوئے کہا کہ یونٹ سے نمونے مشاہدے کے لیے لیے گئے ہیں اور باقی جو مواد دستیاب ہے اسے بعد میں تلف کر دیا جائے گا۔دریں اثنائایس ایچ اوسوپور خالد فیاض نے بتایا کہ اس سلسلے میں مقدمہ درج کر کے مزید تفتیش شروع کر دی گئی ہے۔انہوں نے کہا کہ اس معاملے میں کل صرف دو لوگوں کو گرفتار کیا گیا ہے۔یہاں یہ بات قابل ذکر ہے کہ اس ویڈیو کے وائرل ہونے کے بعد سوپور میں لوگ بیکری کی اشیاء  خریدنے کو لے کر کافی پریشان ہیں۔