عظمیٰ نیوز ڈیسک
سرینگر// 19اپریل کو ہونے والے لوک سبھا انتخابات کے پہلے مرحلے کے لیے نامزدگی کا عمل بدھ سے شروع ہوا۔الیکشن کمیشن آف انڈیاکے مطابق، پہلے مرحلے میں 17 ریاستوں اور چار مرکز کے زیر انتظام علاقوں میں پھیلی ہوئی 102 لوک سبھا سیٹوں پر پولنگ ہوگی۔الیکشن کمیشن نے کہا”پہلے مرحلے کے لیے کاغذات نامزدگی داخل کرنے کا آخری دن 27 مارچ ہے۔ کاغذات نامزدگی کی جانچ پڑتال 28 مارچ کو ہوگی اور امیدوار واپس لینے کی آخری تاریخ 30 مارچ ہے۔ ووٹوں کی گنتی 4 جون کو ہوگی” ۔پہلے مرحلے میں تمل ناڈو کی 39، راجستھان کی 12، اتر پردیش کی8، مدھیہ پردیش کی 6، اتراکھنڈ، آسام اور مہاراشٹر کی پانچ5، بہار کی 4، مغربی بنگال کی 3 نشستوں پر ووٹنگ ہوگی۔ اروناچل پردیش، منی پور، میگھالیہ میں 2 دو نشستیں اور چھتیس گڑھ، میزورم، ناگالینڈ، سکم، تریپورہ، انڈمان اور نکوبار جزائر، جموں و کشمیر، لکشدیپ اور پڈوچیری میں ایک ایک نشست پر بھی انتخابات ہوگا۔
