پکل ڈول اور لوئر کلنائی بجلی منصوبے

 اسلام آباد//بھارت نے پاکستانی وفد کو دریائے چناب پر منصوبوں کے معائنے کی اجازت دے دی ہے جس کے لئے انڈس واٹر کمشنر کی سربراہی میں وفد 27 جنوری کو بھارت جائے گا۔پاکستان اور بھارت کے درمیان آبی تنازعہ پر جمی  برف پگھلنا شروع ہوگئی ہے اور دونوں ممالک کے درمیان مذاکرات کا نیا دور شروع ہونے والا ہے، بھارتی حکام کی جانب سے پاکستانی وفد کو دریائے چناب پر بننے والے بھارتی منصوبے لوئر کلنائی اور پکل ڈول کا معائنہ کرنے کی اجازت مل گئی ہے۔انڈس واٹر کمشنر سید مہر علی شاہ کی سربراہی میں 3 رکنی پاکستانی وفد 27 جنوری کو براستہ واہگہ بھارت روانہ ہوگا، پا کستانی وفد 27جنوری سے یکم فروری تک بھارت کا دورہ کرے گا۔دورے کے حوالے سے  انڈس واٹر کمشنر سید مہر علی شاہ کا کہنا ہے کہ پا کستانی ماہرین کا وفد دریائے چناب پر بننے والے منصوبے لوئر کلنائی اور پکل ڈول کا معائنہ کرے گا، جب کہ بھارت کی جانب سے دریائے چناب پر بنائے جانے والے دیگر منصوبوں کے معائنے کے حوالے سے بھی مثبت اشارے دیئے گئے ہیں۔