حسین محتشم
پونچھ//سرحدی ضلع پونچھ کی وارڈ نمبر 6محلہ گنڈی میں پانی کی عدم دستیابی کی وجہ سے عوام مشکلات سے دوچار ہیں۔شہرویوں نے محکمہ جل شکتی( پی ایچ ای) پر غفلت کا الزام لگایا ہے۔انہوں نے کہا وہ بار بار وارڈ نمبر 6گنڈی میں پانی نہ ہونے کی شکایت کر چکے ہیں تاہم کسی کو کوئی پرواہ نہیں۔ مقامی لوگوں نے ضلع ترقیاتی کمشنر پونچھ یاسین ایم چودھری سے اپیل کی ہے کہ وہ محکمہ کے خلاف سخت کارروائی کریں۔انہوں نے کہا کہ محکمہ کے عہدیداران اور کارکنان سنجیدگی کا مظاہرہ نہیں کر رہے ہیں، ان کا ہر روز کوئی نا کوئی نیا بہانہ ہوتا ہے۔انہوں نے کہا وارڈ نمبر 6گنڈی میں آخری بار 7جولائی کو پانی آیا تھا اس کے بعد محکمہ کے ڈرامے شروع ہو گئے ہیں جو اب تک ختم ہونے کا نام نہیں لے رہے ہیں۔انہوں نے کہا کہ وہ محکمہ کی کارکردگی سے بالکل مطمئن نہیں ہیں کیونکہ ان کو پانی کی مناسب فراہمی نہیں ہو رہی ہے۔انہوں نے کہا مایوسی کے عالم میں لوگوں نے فیصلہ کیا ہے کہ اگر اس مسئلہ پرجلد کوئی کارروائی نہیں کی گئی تو وارڈ نمبر 6گنڈی کے لوگ احتجاج کریں گے اور اس کی ذمہ داری محکمہ پی ایچ ای پونچھ پر عائد ہوگی۔
